މެދު ހެންވޭރާއި، ގަލޮޅު ދެކުނަށް ވަޑައިގެން އާންމުންނާ ބައްދަލު ކުރުމުން އިވެމުން ދިޔައީ ސަރުކާރާމެދު ހުރި ޝަކުވާތަކުގެ އަޑު ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މިމަހުގެ 31 ވަނަ ދުވަހު ހަވީރު އާޓިފިޝަލް ބީޗުގައި އެމްޑީީ އިން ބާއްވާ ހަރަކާތުގެ މައުލޫމާތު ޙިއްސާކޮށް، އެ އެއްވުމަށް ދިޔުމުގެ ދައުވަތާއެކު އެމްޑީޕީގެ ޓީމުތަކާއެކު އެ ދެ އަވަށަށް ވަޑައިގަތުމަށްފަހު ޝާހިދު ވިދާޅުވީ ދެ އަވަށުންވެސް އިވުނީ ސަރުކާރާމެދު އެއް ޝަކުވާތަކެއް ކަމަށެވެ.
"ސަރުކާރުގެ ނާޤާބިލު، ނޭއްގާނީ ސިޔާސަތު ތަކުގެ ސަބަބުން ދިވެހި ރައްޔިތުން ތިބީ މާޔޫސް ވެފައި" ޝާހިދު ވިދާޅުވިއެވެ.
ޝާހިދު ވިދާޅުވީ، ޖެނުއަރީ 31 ވަނަ ދުވަހު އެމްޑީޕީ އިން ނުކުމެ، ސަރުކާރަށް ރައްޔިތުންގެ އަޑު އިއްވާނެ ކަމަށެވެ.
ޖެނުއަރީ 31 ގެ ހަރަކާތުގެ މައުލޫމާތު އާންމުންނާ ޙިއްސާ ކުރުމަށް އެމްޑީޕީގެ ޓީމުތަކުން ދަނީ މާލެ ސިޓީގެ އެކި ހިސާބުތަކުގައި ކޮންމެ ދުވަހަކު މަސައްކަތް ކުރަމުންނެވެ.
