ރައީސް ޑރ. މުޙަންމަދު މުއިއްޒުގެ ސަރުކާރާމެދު އެންމެންވެސް މިހާރު ތިބީ ނުރުހިފައި ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މިމަހުގެ 31 ވަނަ ދުވަހު ހަވީރު އާޓިފިޝަލް ބީޗު ސަރަހައްދުގައި އެމްޑީޕީން ބާއްވާ ހަރަކާތުގެ މައުލޫމާތު ޙިއްސާ ކުރުމަށް މާލޭގެ އެކި ސަރަހައްދުތަކުން ރައްޔިތުންނާ ބައްދަލު ކުރުމަށް އެ ޕާޓީން ހިންގާ ހަރަކާތްތަކުގައި މާރުކޭޓު ސަރަހައްދާއި ގަލޮޅު ދެކުނު ދާއިރާއަށް ވަޑައިގަތުމަށްފަހު، އެކްސްގައި ޝާހިދު ވިދާޅުވީ، ރައްޔިތުން މިހާރު ތިބީ "ފުނޑިފައި" ކަމަށެވެ.
"މަގުމަތިން ބައްދަލުވި އެންމެންވެސް ތިބީ މިހާރުގެ ސަރުކާރާމެދު ނުރުހިފައި. ރައްޔިތުން ތިބީ ފުނޑިފައި" ރައްޔިތުން ބުނަނީ ފުދިއްޖޭ" ގަލޮޅު ދެކުނަށް ވަޑައިގަތުމަށްފަހު ޝާހިދު ވިދާޅުވިއެވެ.
މާލޭ މާރުކޭޓު ސަރަހައްދުގައި އުޅޭ ވިޔަފާރިވެރިންނާއި އޮޑިވެރިންނާ ބައްދަލު ކުރެއްވުމަށްފަހު ޝާހިދު ވިދާޅުވީ، އެފަރާތްތަކުންވެސް ބުނަމުން ދަނީ މިހާރު "ފުދިއްޖެ" ކަމަށެވެ.
"ވިޔަފާރިވެރިންނާ ދަނޑުވެރިންނާ މަސްވެެރިންނާ އޮޑިވެރިންވެސް ބުނަނީ ފުދިއްޖެޔޭ ފުނޑިއްޖެޔޭ" ޝާހިދު ވިދާޅުވިއެވެ.
ޝާހިދު ވިދާޅުވީ 31 ވަނަ ދުވަހު ހަވީރު 4 ޖަހާއިރު، ރައްޔިތުންގެ އަޑު ސަރުކާރަށް އިއްވުމަށް އާޓިފިޝަލް ބީޗަށް ދިޔުމުގެ ދައުވަތު ހުރިހާ ފަރާތަކަށް ދެއްވާ ކަމަށެވެ.
