މާލެ ސަރަހައްދުގެ ސިއްޙީ ގޮތުން ނުރައްކާވާ މިންވަރަށް ވައި ނުސާފު ވުމުގެ ސަބަބުން އެކަމަށް ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފިއެވެ.

އެޗްޕީއޭއިން އެކަމާބެހޭ ގޮތުން ނެރުނު ލިޔުމެއްގައި ބުނީ ވައި ނުސާފު ވަގުތު ތަކުގައި ރައްކާތެރިވެ ސަމާލުވެ ތިބުމަށް އެދޭ ކަމަށެވެ. އެގޮތުން އެފަދަ ވަގުތު ތަކުގައި މާސްކް އަޅައިގެން ބޭރަށް ނުކުތުމަށްވެސް އެޗްޕީއޭއިން ވަނީ އިލްތިމާސް ކޮށްފައެވެ. މި ދުވަސްވަރު މާލެ ސަރަހައްދުގައި އާދަޔާ ޚިލާފަށް ވަނީ ވައި ނުސާފުވެފައެވެ.

ވިލިމާލޭގައި ހުންނަ ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގެ ކެމްޕަސް އިމާރާތުގައި ހުރި އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުން، މާލޭ ސަރަހައްދުގެ ވައިގެ ކޮލިޓީ މި ވަގުތު ހުރީ އެއީ 156 ގައެވެ. އެއީ ވަރަށް ނުރައްކާ މިންވަރެކެވެ.

ވައިގެ ނުސާފުމިން 51 އަށް އެރުމުންވެސް ބަލަނީ އެއީ ނޭވާލުމުގެ ނިޒާމަށް ނުރައްކާވާ ކަމަށެވެ. އެފަދަ ވަގުތު ޚާއްސަ ހާލަތުގައިވާ މީހުން ބޭރަށް ނުކުމެއުޅުން ރަނގަޅެއްނޫނެވެ. މިހާރު ވައިގެ ނުސާފުމިން 156 އަށް އަރާފައިވާއިރު، 151 ން 200 އާ ދެމެދުގެ މިންގަނޑަކީ ފުއްޕާމެއާއި ހިތުގެ ބަލިތައް ބޮޑުވުމުގެ ނުރައްކާ ހުރިހާ އުމުރަކަށްވެސް ބޮޑު މިންވަރެއްގެ ގޮތުގައި ސިއްޙީ މާހިރުން ވަނީ ނިންމާފައެވެ.