އެމްޑީޕީގެ ޓީމުތަކުން މާލެ ސިޓީގެ ގެތަކަށް މިހާރު ކުރަމުންދާ ޒިޔާރަތް ތަކުގައި ބައްދަލުވާ ރައްޔިތުން ބުނަމުން ދަނީ، ތަކެތީގެ އަގު ބޮޑުވެ، ސަރުކާރުގެ ތެރޭގައި ކޮރަޕްޝަން އިތުރުވެ، ދަރަނިވެސް އަތް ނުފޯރާ ފަށަށް ގޮސްފައިވާ ވާހަކަ ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މައްޗަންގޮޅީގެ ބައެއް ގެތަކަށް މިއަދު ޒިޔާރަތް ކުރައްވައި، އާންމުންނާ ބައްދަލު ކުރެއްވުމަށްފަހު މިރޭ ޝާހިދު އެކްސްގައި ވިދާޅުވީ، އެ ހުރިހާ ސަބަބަބުތަކާ ހުރެ ރައްޔިތުން މިހާރު ބުނަމުން ދަނީ "ފުދިއްޖެއޭ، ފުނޑިއްޔެއޭ" ކަމަށެވެ.
"31 ޖެނުއަރީގައި އެމްޑީޕީ އިން ބާއްވާ ހިނގާލުމާބެހޭ މައުލޫމާތު ހިއްސާކޮށް، ރައްޔިތުންނާ ބައްދަލު ކުރުމަށް މިއަދު އަޅުގަނޑުމެން މައްޗަންގޮޅީގެ ބައެއް ގޭގެއަށް ޒިޔާރަތްކުރިން. ތަކެތީގެ އަގު ބޮޑުވެ، ސަރުކާރުގެ ކޮރަޕްޝަން އިތުރުވެ، ދަރަނި އަތްނުފޯރާ ފަށަށް ދާތީ ރައްޔިތުން ބުނަނީ ފުދިއްޖެއޭ، ފުނޑިއްޖެއޭ" ޝާހިދު ވިދާޅުވިއެވެ.
މިރޭވެސް ޝާހިދު އެދިވަޑައިގަތީ، ރައްޔިތުންގެ އަޑު ސަރުކާރަށް އިއްވުމަށްޓަކައި މިމަހުގެ 31 ވަނަ ދުވަހުގެ ހަވީރު ހަތަރެއް ޖަހާއިރު އެމްޑީޕީ އިން ބާއްވާ އެއްވުމަށް އާންމުން ދިޔުމަށެވެ.
އެމްޑީޕީ އިން މިމަހުގެ 31 ވަނަ ދުވަހު ބާއްވާ ހިނގާލުމަށް އެ ޕާޓީން ދަނީ ތައްޔާރު ވަމުންނެވެ. އެގޮތުން މިވަގުތު ކުރިއަށް ގެންދަނީ އެ އެއްވުމާއިބެހޭ މައުލޫމާތު އާންމުންނަށް ދިނުމަށެވެ. އެގޮތުން އެމްޑީޕީގެ އެކި ޓީމުތަކުން ދަނީ މާލެ ސިޓީގެ ގެތަކަށް ޒިޔާރަތްކޮށް އެއްވުމާބެހޭ މައުލޫމާތު ހިއްސާ ކުރަމުންނެވެ.
