ދިވެހި ރައްޔިތުންގެ ޕާޓީ (ޑީއާރުޕީ) އިން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް ދައްކަންޖެހޭ ދަރަންޏަށް، އެ ޕާޓީގެ ކުރީގެ ޒައީމް، ކުރީގެ ރައީސް މައުމޫން އަބްދުލްގައްޔޫމް ޒިންމާ ކުރުވުމަށް ހައި ކޯޓަށް ހުށަހެޅި މައްސަލައާއި ގުޅިގެން، ސުޕްރީމް ކޯޓަށް ހުށަހެޅި އިސްތިއުނާފުގެ އަޑުއެހުމެއް، އަންނަ ބުދަ ދުވަހަށް ތާވަލް ކޮށްފިއެވެ.
އެދުވަހުގެ އަޑުއެހުމުގައި ސުޕްރީމް ކޯޓުގެ ބެންޗުގައި ތިއްބަވާނެ ފަނޑިޔާރުންގެ ގޮތުގައި ހަމަޖައްސަވާފައި ވަނީ، ފަނޑިޔާރު ޑރ. އަޒްމިރާލްދާ ޒާހިރު އާއި ފަނޑިޔާރު އާއިޝާ ޝުޖޫން މުހައްމަދުގެ އިތުރުން ފަނޑިޔާރު ޑރ. މުހައްމަދު އިބްރާހީމެވެ.
އެ މައްސަލައިގެ އަޑުއެހުމެއް ސުޕްރީމް ކޯޓުގައި ތާވަލް ކޮށްފައި މިވަނީ މައްސަލަ އިސްތިއުނާފަށް ހުށަހެޅިތާ 9 މަސް ދުވަސް ފަހުންނެވެ. ޑީއާރުޕީ އިން އެމްޓީސީސީއަށް ދައްކަންޖެހޭ ދަރަންޏަށް މައުމޫން ޒިންމާ ކުރުމަށް ހުސަހެޅި މައްސަލައިގައި، އެ ދަރަންޏަށް މައުމޫނު ޒިންމާ ނުކުރެވޭނެ ކަމަށް 2023 ވަނަ އަހަރުގެ ޖޫންމަހު ސިވިލް ކޯޓުން ވަނީ ނިންމައިފައެވެ. އެ ނިންމުމާއި ގުޅިގެން އެމްޓީސީސީން ވަނީ އެ ހުކުމް އިސްތިއުނާފު ކުރުމަށް ހައި ކޯޓަށް ހުށަހަޅައިފައެވެ.
އެމްޓީސީސީން ޑީއާރުޕީއާއި ދެކޮޅަށް ސިވިލް ކޯޓަށް ހުށަހެޅި މައްސަލައިގައި ބުނެފައިވަނީ، އެމްޓީސީސީން ވަނީ 1.1 މިލިއަން ރުފިޔާގެ ޚިދުމަތް ޑީއާރުޕީއަށް ފޯރުކޮށްދީފައި ކަމަށާއި ނަމަވެސް އެ ޕާޓީން ފައިސާ ދައްކައިފައި ނުވާކަމަށެވެ.
ކުރިން ރާއްޖޭގެ އެންމެ ބޮޑު އިދިކޮޅު ޕާޓީގެ ގޮތުގައި އޮތް ޑީއާރުޕީން އެކި ފަރާތްތަކަށް ދައްކަންޖެހޭ ދަރަނިތައް އެބަހުއްޓެވެ. ޑީއާރުޕީގެ ކުރީގެ ލީޑާޝިޕުން ޕާޓީގެ ދަރަނިތައް ނުދައްކައި، ޕާޓީގެ މެންބަރުންގެ ބޮލުގައި އެ ދަރަނިތައް އަޅުވާފައިވާ ކަމަށް ތުހުމަތުކޮށް އެ ޕާޓީގެ ކުރީގެ ޒައީމް މައުމޫނަށް ދައުވާ ކުރަން އެ ޕާޓީގެ އޭރުގެ ކައުންސިލުންވެސް 2020 ވަނަ އަހަރުގެ އޮކްޓޯބަރު މަހުގެ 13 ވަނަ ދުވަހު ނިންމިއެވެ.
ޑީއާރުޕީ ދަރަނީގެ ތެރެއިން ހަބް ކޮމްޕެނީ ޕްރައިވެޓް ލިމިޓެޑުން ޑީއާރުޕީއަށް ފޯރުކޮށްދީފައިވާ ޚިދުމަތްތަކަށް ދައްކަންޖެހޭ 718،438 ރުފިޔާ ދައްކަންޖެހޭ މައްސަލައެއްވެސް ދަނީ ސުޕްރީމް ކޯޓުގައި ހިނގަމުންނެވެ. އެ މައްސަލައިގެ އަޑުއެހުމަކަށް އޭރު އެ ޕާޓީގެ ލީޑަރަކަށް ހުންނެވި ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވަޑައިގެން މައުމޫން ކޯޓަށް ހާޒިރު ކޮށްދިނުމަށް އެދިވަޑައިގަތެވެ. ނަމަވެސް އެގޮތަށް ސުޕްރީމް ކޯޓުން އަމުރު ކޮށްފައެއް ނުވެއެވެ.
ހަބުން ޑީއާރުޕީއަށް ފޯރުކޮށްދިން ޚިދުމަތްތަކަކީ 2008 ވަނަ އަހަރު ޑީއާރުޕީގެ ފަރާތުން މައުމޫން ކެމްޕެއިނަކަށް ވަޑައިގެންނެވުމަށް ލައިޓިން އާއި އިންޖިނިއަރިންގެ ޚިދުމަތްތަކެވެ.
