އަޅުގަނޑު ނުވަތަ އަޅުގަނޑުގެ ވިސްނުމަށް ވަކާލާތުކުރާ މީހަކު ކޮންމެވެސް ދުވަހަކުން ރައީސް ކަމަށް ހޮވާނެ: އުމަރު

އުމަރު ނަސީރު ނުވަތަ އޭނާގެ ގެންގުޅުއްވާ ވިސްނުމާއި އުސޫލުތައް ގެންގުޅުއްވާ ބޭފުޅަކު ދިވެހިރާއްޖޭގެ ރައީސް ކަމަށް ކޮންމެވެސް ދުވަހަކުން ދިވެހިން ހޮވާނެ ކަމަށް އުމަރު ނަސީރު ވިދާޅުވެއްޖެއެވެ.

ޗެނަލް ތޭރައިގެ ޕްރޮގްރާމެއްގައި ވާހަކަ ދައްކަވަމުން އުމަރު ވިދާޅުވީ، އޭނާއަކީ "އަރާ ތަރިއެއް" ކަމަށާއި، އޭނާއަކީ "އޮއްސޭ ތަރިއެއް ނޫން" ކަމަށެވެ.

"އަޅުގަނޑަށް ޔަގީންވާ ކަމަކީ އިނގޭތޯ ހުންނާނެ އަރާ ތަރި އާއި އޮއްސޭ ތަރިއާ. އަޅުގަނޑަކީ އަރާ ތަރިއެއްކަން އިނގޭތޯ. އެއްވެސް ޝައްކެއް ނެތް. އަދި އަޅުގަނޑު ވަރަށް ދުވަސްވެއްޖެ އެގޮތަކަށް އެއްވާހަކައެއް ދައްކާތާ. އަޅުގަނޑަށް ލިބޭ ވޯޓުވެސް ދަނީ ހަމަ މައްޗަށް." އުމަރު ވިދާޅުވިއެވެ.

އުމަރު ވިދާޅުވީ ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބުގައިވެސް އޭނާ ވާދަކުރައްވާނެ ކަމަށާއި ކުރިމަތި ލައްވާނީވެސް މިނިވަން ކެންޑިޑޭޓެއްގެ ގޮތުގައި ކަމަށެވެ.

"އަޅުގަނޑުގެ ސްލޯގަންއަކީވެސް ހަމަ ހައްލަކީ އުމަރު އިނގޭތޯ." އުމަރު ވިދާޅުވިއެވެ.

އުމަރު ވިދާޅުވީ ދިވެހިން ކޮންމެވެސް ދުވަހަކުން ސިޔާސީ ޕާޓީ ތަކަށް ނޫނެކޭ ބުނާނެ ކަމަށެވެ. އަދި ރާއްޖެއަށް ސީރިއަސް ބަދަލެއް ގެންނަން ދިވެހިން ބޭނުންނަމަ، ސިޔާސީ ޕާޓީތަކަށް ނޫނެކޭ ބުނަންޖެހޭ ކަމަށްވެސް ވިދާޅުވިއެވެ.

"އަޅުގަނޑުމެން މި ހުރިހާ ސިޔާސީ ޕާޓީތަކަށް ވޯޓު ދީގެން ލިބޭނީ ހަމަ އެކައްޗެއް. އެއްވެސް ތަފާތު އެއްޗެއް ނުލިބޭނެ." އުމަރު ވިދާޅުވިއެވެ.

އުމަރުގެ އުންމީދަކީ ކޮންމެވެސް ދުވަހަކުން ދިވެހިރާއްޖޭގެ ރައީސް ކަމަށް ވަޑައިގަތުމުގެ ފުރުޞަތު ދިވެހިން އޭނާއަށް ދިނުންކަންވެސް ފާހަގަ ކުރެއްވިއެވެ.

"އަޅުގަނޑަށް އެއްވެސް ޝައްކެއް ނެތް ކޮންމެވެސް ދުވަހަކުން ދިވެހިން މި ހުރިހާ ސިޔާސީ ޕާޓީތަކަށް ނޫނެކޭ ބުނެފަ، އަޅުގަނޑަށް ނުވަތަ އަޅުގަނޑުގެ މި އައިޑީއާއަށް ވަކާލާތު ކުރާނެ މީހަކު ދިވެހިރާއްޖެއިން ހޮވާނެކަން." އުމަރު ވިދާޅުވިއެވެ.