ރާއްޖޭގައި މުޒާހަރާކޮށް މަގު މަތިން ވެރިކަން ބަދަލު ނުވާނެ ކަމަށް ރައީސް ޑރ. މުޙަންމަދު މުއިއްޒު ހީފުޅުކުރައްވައިގެން ނުވާނެ ކަމަށާއި، މަގުމަތިން ވެރިކަން ބަދަލުކުރާ ހިސާބަށް ގޮސްފިއްޔާ، ވެރިކަން ބަދަލުކުރަން މަގުމައްޗަށްވެސް ނުކުމެވަޑައިގަންނަވާނެ ކަމަށް އުމަރު ނަސީރު ވިދާޅުވެއްޖެއެވެ.
ޗެނަލް 13 ގެ ޕްރޮގްރާމެއްގައި ވާހަކަ ދައްކަވަމުން އުމަރު ވިދާޅުވީ، މުޒާހަރާކޮށްގެން މަގުމަތިން ވެރިކަން ބަދަލު ކުރުމަކީ ރާއްޖޭގައި އާކަމެއް ނޫން ކަމަށާއި ރާއްޖޭގެ ތަރީޚުގައި ވަރަށްގިނައިން އެކަން ރައްޔިތުން ކޮށްފައިވާ ކަމަށެވެ.
"މަގުމަތިން އިންގިލާބެއް ގެންނަން ޖެހިއްޖިއްޔާ އިންގިލާބުވެސް ގެންނާނެ. އެއްގޮތަކަށްވެސް މުއިއްޒު ހީފުޅުނުކުރައްވާތި އިނގޭތޯ ދިވެހިން މަގުމައްޗަށް ނުކުމެ، މަގުމަތިން ސަރުކާރު ނުވައްޓާނެ ކަމަށް. ދިވެހިންނަކީ މަގުމަތިން ސަރުކާރު ވައްޓާބައެއް" އުމަރު ވިދާޅުވިއެވެ.
އުމަރު ވިދާޅުވީ، މަގުމަތިން ސަރުކާރު ބަދަލު ކުރަނީ ހަމައެކަނި ބަންގްލަދޭޝް މީހުން ނޫން ކަމަށާއި، ދިވެހިން މާކުރިން އެކަން ކުރަމުން އަންނަ ކަމަށެވެ.
"ދިވެހިންނަކީ ހުކުރުން ފައިބައިގެން ގުޅަކުޅޭ ފަސްގަނޑަށް ނުކުމެ ރަސްގެފާނު ބަދަލުކޮށްފަ ގެއަށްދާ ބައެއް. މިއީ ނޯމަލްކަމެއް އަޅުގަނޑުމެންގެ ތެރޭގައި. އެހެންވީމަ އަޅުގަނޑުވެސް މި ދަންނަވަނީ މުއިއްޒުވެސް ހީފުޅުކުރައްވައިގެން ނުވާނެ މުޒާހަރާ ކޮށްގެން ސަރުކާރު ބަދަލުކޮށްނުލާނެ ކަމަށް. އެހިސާބަށް އައިސްފިއްޔާ އަޅުގަނޑުވެސް ހަމަ ނުކުންނާނެ ސަރުކާރު ބަދަލުކޮށްލަން އިނގޭތޯ. އެ ހިސާބަށް ތިރިވެއްޖިއްޔާމު" އުމަރު ވިދާޅުވިއެވެ.
