ރިސޯޓު ތަކުގައި މަސައްކަތް ކުރަމުން އަންނަ މުވައްޒަފުންނަށް ސާވިސްޗާޖު ދިވެހި ރުފިޔާއިން ދޭން ރިސޯޓުތަކުގެ މެނޭޖްމަންޓުން އުޅުނަސް، އެގޮތާ އެއްބަސްނުވާން ޓޫރިޒަމް އެމްޕްލޯޔީސް އެސޯސިއޭޝަން (ޓީމް) އިން މުވައްޒަފުންގެ ކިބައިން އެދިއްޖެއެވެ.

ދާދިފަހުން ސަރުކާރުން ގާނޫނަށް ގެނައި އިސްލާޙާއި ގުޅިގެން ގިނަ ރިސޯޓުތަކުން ބުނަމުން ދަނީ ސަރުކާރުން ގެނައި ބަދަލުގެ ސަބަބުން ދެން މުވައްޒަފުންގެ ސާވިސް ޗާޖު ކުރިން ދިންގޮތަށް ޑޮލަރުން ނުދެވޭނެ ކަމަށެވެ. ސާވިސްޗާޖު މިމަހުން ފެށިގެން ދޭނީ ދިވެހި ރުފިޔާއިން ކަމަށެވެ.

ނަމަވެސް، ޓީމް އިން ނެރުނު ބަޔާނެއްގައި ބުނެފައި ވަނީ ރިސޯޓުތަކަށް ލިބޭ އާންމުދަނީގެ ބޮޑު ބަޔެއް ބޭންކް ތަކަށް މާރު ކުރަން މަޖުބޫރު ކުރުންވެސް ޓީމް އިން ކުށްވެރި ކުރާ ކަމަށާއި، ނަމަވެސް އެ ބަދަލާހުރެ މުވައްޒަފުންނަށް މީގެކުރިން ޑޮލަރުން ދެމުން އައި ސާވިސްޗާޖު ދިވެހި ރުފިޔާއިން ދެވިގެންނުވާނެ ކަމަށެވެ.

"ޓުއަރިޒަމްގެ ދާއިރާގައި މަސައްކަތް ކުރާ އެއްވެސް މަސައްކަތްތެރިއަކު، ދިވެހި ރުފިޔާއިން މުސާރަ އަދި ސާވިސް ޗާޖު ނެގުމަށް އެއްބަސްނުވުމަށާއި ވަޒީފާގެ ލިޔުން ބަދަލުކޮށް އެފަދަ އެއްވެސް ލިޔުމެއްގައި ސޮއި ނުކުރުމަށް ގޮވާލަން،" ނޫސްބަޔާނުގައި ޓީމް އިން ބުނެފައިވެއެވެ.

ޓީމް އިން އިތުރަށް ބުނެފައި ވަނީ، ސާވިސްޗާޖު ދޭންޖެހޭނީ ދިވެހި ރުފިޔާއިން ކަމަށް ބުނެފައިވާ އެއްވެސް ގާނޫނެއްވެސް އަދި ގަވައިދެއްވެސް ނެތް ކަމަށެވެ. އަދި މީގެކުރިން ޑޮލަރުން ދެމުން އައި ސާވިސްޗާޖު، ދިވެހި ރުފިޔާއިން ދޭން ފަށައިފިނަމަ، އެއީ މުވައްޒަފުންނަށް މާލީގޮތުން ލިބޭ ވަރަށް ބޮޑު ދެރައެއްކަން ޓީމް އިން ފާހަގަ ކޮށްފައިވެއެވެ.

"މި ބަދަލު މިހާރު ގެނައުމުން ރިސޯޓު ތަކުގައި މަސައްކަތްކުރާ ފަރާތްތަކަށް 3000 ނުވަތަ 5000 ރުފިޔާގެ މާލީ ގެއްލުމެއް ނުވަތަ އާމުދަނީ ދަށްވުމަކާ ކުރިމަތިލާންޖެހޭ" ޓީމް އިން ބުންޏެވެ.

ސަރުކާރުން ދާދިފަހުން ގެނައި ބަދަލާއެކު ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު ބޭންކްތަކަށް މާރު ކުރަން މަޖުބޫރެވެ. މިކަމަށް ސަރުކާރުން ފަހުން ދީފައިވާ ލުޔަކީ ކޮންމެ ބޮލަކަށް 500 ޑޮލަރު ނުދެވޭ ޙާލަތެއްގައި ކޮންމެ މަހަކުވެސް ރިސޯޓަށް ޑޮލަރުން ލިބުނު އާންމުދަނީގެ 20 ޕަސެންޓް ބޭންކްތަކަށް މާރު ކުރުމެވެ. މި ބަދަލުތަކާއި ގުޅިގެން ރިސޯޓުތަކުންވެސް ވަނީ ކަންބޮޑުވުން ފާޅުކޮށްފައެވެ.