ސައުދީއަރަބިއްޔާގެ ހައްޖާބެހޭ ޑރ. ތައުފީގު ރަބީއާގެ ދައުވަތަކަށް ރާއްޖޭގެ އިސްލާމީ ކަންކަމާބެހޭ ވަޒީރު ޑރ. މުޙަންމަދު ޝަހީމް އަލީ ސައީދު ސައުދީއަރަބިއްޔާއަށް ވަޑައިގެންފިއެވެ.

އިސްލާމިކް މިނިސްޓްރީން ބުނިގޮތުގައި މިދަތުރުގައި ހައްޖާބެހޭ އެއްބަސްވުމުގައި ސޮއި ކުރުންވެސް އޮންނާނެއެވެ. އެއީ ކޮންމެ އަހަރަކުވެސް ދެގައުމުގެ ދެމެދުގައި އާކޮށް، ސޮއި ކުރަމުން އަންނަ އެއްބަސްވުމެކެވެ.

މީގެއިތުރުން ރާއްޖެއިން ހައްޖާއި އުމްރާއަށްދާ މީހުންގެ ކަންކަން މިހާރަށްވުރެ ހަރުދަނާ ކުރުމުގެ މަޝްވަރާވެސް ދެ ވަޒީރުން ކުރައްވާނެ ކަމަށް މިނިސްޓްރީން ބުނެއެވެ. ރާއްޖެއަށް މިވަގުތު ލިބެމުން އަންނަ އެއްހާސް ހައްޖު ކޯޓާ އިތުރު ކުރުމަކީވެސް މި ސަރުކާރުން ވެފައިވާ ވައުދެކެވެ.