ނިމިދިޔަ ރިޔާސީ އިންތިޚާބުގައި "އިބޫ ނޫން ގޮތެއް" ހޯދުމަށް ކަމަށްބުނެ، ޑިމޮކްރެޓްސްގެ ނަމުގައި އަލަށް އުފެއްދި ޕާޓީއަށް އޭރުދިޔަ އިސްބޭފުޅުންކޮޅެއް އަލުން އެނބުރި އެމްޑީޕީއަށް ސޮއި ކޮށްފި ކަމަށް އިތުބާރު ހުރި ގޮތަކަށް މައުލޫމާތު ލިބިއްޖެއެވެ.
މައުލޫމާތު ދިން އިތުބާރު ހުރި ފަރާތުން ބުނީ، މިހާރު އެމްޑީޕީއަށް ސޮއި ކޮށްފައި ވަނީ ނިމިދިޔަ ރިޔާސީ އިންތިޚާބުގައި ޑިމޮކްރެޓްސް އިން ނުކުތް ރިޔާސީ ކެންޑިޑޭޓް އިލްޔާސް ލަބީބުގެ ރަނިންމޭޓް، އެސްޓީއޯގެ ކުރީގެ އެމްޑީ ޙުސައިން އަމްރު އާއި ޑިމޮކްރެޓްސްގެ ނައިބު ރައީސް، ރައީސް އޮފީހުގެ ކުރީގެ މިނިސްޓަރު މުޙަންމަދު ޝިފާޒް އާއި ކައުންސިލް މެމްބަރު، ރައްޔިތުންގެ މަޖިލީހުގެ މެދުހެންވޭރު ދާއިރާގެ ކުރީގެ މެމްބަރު އަލީ އާޒިމް ކަމަށެވެ.
ނަމަވެސް މި ތިންބޭފުޅުން އެމްޑީޕީއަށް ސޮއި ކުރިކަން އެ ޕާޓީގެ ފަރާތުން ރަސްމީކޮށް އަދި ހާމައެއް ނުކުރެއެވެ. އަދި އެ ތިންބޭފުޅުންވެސް އެކަން ރަސްމީކޮށް އެކަން ހާމައެއް ނުކުރެއެވެ. މައުލޫމާތު ލިބިފައިވާ ގޮތުގައި ޑިމޮކްރެޓްސްގެ އިތުރު މެމްބަރުންތަކެއްވެސް ވަރަށް އަވަހަށް އެނބުރި އެމްޑީޕީއަށް ބަދަލުވުމަށް ވަނީ ނިންމާފައެވެ.
ނިމިދިޔަ ރިޔާސީ އިންތިޚާބުގެ ރިޔާސީ ޓިކެޓުގެ ވާދަވެރިކަން ބޮޑުވެ، އޭރުގެ ރައީސް އިބްރާހީމް މުޙަންމަދު ސޯލިހާއި އޭރު އެމްޑީޕީގެ ރައީސް ކަމުގައި ހުންނެވި މަޖިލީހުގެ ރައީސް މުޙަންމަދު ނަޝީދުގެ ދެޓީމުގެ ކޯޅުން ބޮޑުވެ، ނަޝީދު އިސްވެ ހުންނަވައި އުފެއްދެވި ޑިމޮކްރެޓްސްއަށް އެމްޑީޕީގެ އިސް ސަފުގައި ހިމެނޭ ގިނަ ބޭފުޅުންކޮޅެއް ބަދަލުވިއެވެ. އޭގެތެރޭގައި މަޖިލީހުގެ މެމްބަރުންތަކަކާއި ސަރުކާރުގެ ބަޔެއް އޮފީސްތަކާއި ކުންފުނިތަކުގައި ތިއްބެވި ސިޔާސީ އިސްބޭފުޅުންވެސް ހިމެނުނެވެ.
"އިބޫ ނޫން ގޮތެއް" ހޯދަން ބޭނުންކަމަށް ބުނެ އޭރު ޑިމޮކްރެޓްސްއިން އެންމެ ފުރަތަމަ ނުކުތީ ރިޔާސީ އިންތިޚާބަށެވެ. އިލްޔާސް ލަބީބު ކެންޑިޑޭޓެއްގެ ގޮތުގައި ނެރެގެން ފުރަތަމަ ބުރުގައި ލިބުނު ނާކާމިޔާބަށްފަހު، ދެން ޑިމޮކްރެޓްސްގެ ގިނަ މެމްބަރުން ތާއީދު ކުރީ ރައީސް ޑރ. މުޙަންމަދު މުއިއްޒަށެވެ.
ނަމަވެސް ރައީސް މުއިއްޒުގެ ވެރިކަމަށް އަހަރެއް ވުމުން ދެން ފެނުނީ ޑިމޮކްރެޓްސްއިން ރައީސް މުއިއްޒުގެ ސަރުކާރަށް ފާޑުކިޔުން އަމާޒު ކުރަމުންދިޔަ މަންޒަރެވެ.
