ރާއްޖެއަކީ ފަތުރުވެރިންނަށް އަމާން މަންޒިލެއް ކަމަށާއި، ރާއްޖޭގައި ފަތުރުވެރިންނަށް އެއްވެސް ނުރައްކަލެއް ނެތް ކަމުގައި ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީގެ ސްޓޭޓް މިނިސްޓަރު ކަމުގައި ހުންނަވައި، ޕީއެންސީގެ ޖަލްސާއެއްގައި މުޙަންމަދު ނިހާދު ދެއްކެވި ވާހަކަތަކާއި ގުޅިގެން މިނިސްޓްރީން ނެރުނު ނޫސްބަޔާނެއްގައި ބުނީ، ޓޫރިޒަމްގެ ސިނާއަތަށް އެއްވެސް ނުރައްކަލެއް ނެތް ކަމަށެވެ.
މިހާރު ސަސްޕެންޑް ކޮށްފައިވާ ނިހާދު ޖަލްސާގައި ވިދާޅުވީ، ޓޫރިޒަމް އިންޑަސްޓްރީއަށް އަމާޒުކޮށް ޓެރަރިސްޓު ހަމަލާއެއް ދޭން އެމްޑީޕީއިން ރާވާފައިވާ ކަމަށެވެ. ނަމަވެސް މިނިސްޓްރީން ބުނީ އެއީ ސަރުކާރުގެ ވިސްނުން ނޫން ކަމަށާއި، އެއީ އޭނާ އަމިއްލަ ގޮތުން ދެއްކި ވާހަކަތަކެއް ކަމަށެވެ. އަދި އެފަދަ ވާހަކައެއް ދެއްކެވީތީ އެކަން ބަލަމުން އަންނަ ކަމަށްވެސް މިނިސްޓްރީން ވަނީ ބުނެފައެވެ.
މިނިސްޓްރީން ބުނީ، ރާއްޖެއަށް މިއަހަރު 2 މިލިއަން ފަތުރުވެރިން އައުމާއި ގާތްވެފައި ވުމަކީ ފަތުރުވެރިން ރާއްޖެއަށް ކުރާ އިތުބާރު ދައްކުވައިދޭ ކަމެއް ކަމަށެވެ.
ނިހާދު ދެއްކި ވާހަކަތައް ކުށްވެރިކޮށް އެމްޑީޕީގެ އިތުރުން ސަރުކާރު ހިންގާ މައި ޕާޓީ، ޕީއެންސީންވެސް ވަނީ ނޫސްބަޔާނެއް ނެރެފައެވެ. ނިހާދުގެ ތުހުމަތުތައް ދޮގުކޮށް، އެކަން ސީރިއަސް މައްސަލައެއްގެ ގޮތުގައި ބަލައިދިނުމަށް އެމްޑީޕީން ގޮވާލިއިރު، ޕީއެންސީން ބުނެފައި ވަނީ ޓޫރިޒަމް ދާއިރާއަށް ގެއްލުމެއް ލިބޭނެ އެފަދަ ކަމެއް އެމްޑީޕީން ކުރާނެކަމަށް އެ ޕާޓީން ގަބޫލު ނުކުރާ ކަމަށެވެ.
މި މައްސަލައިގައި ނިހާދަށް ގިނަބަޔެއްގެ ފާޑުކިޔުން އަމާޒުވެ، އިއްޔެ އޭނާ ވަނީ މަގާމުން ސަސްޕެންޑް ކޮށްފައެވެ.
