ބިންވެރިޔާ ސްކީމްގެ ދަށުން ގޯތި ލިބިފައިވާ ކަމަށް ބުނެ ސައްހަ ނޫން ލިޔުންތަކެއް ހުށަހަޅައިގެން ބިން ހޯދުމަށް މަސައްކަތްކޮށްފައި ވަނީ ތިން ބިމަކަށް ކަމަށާއި ހަ ފަރާތަކުން އެ ބިންތަކަށް ލިޔުން ހުށަހަޅާފައިވާކަން ފާހަގަވެފައިވާކަމަށް ފުލުހުން މިއަދު ބުނެފި އެވެ.
ފުލުހުން މިރޭ ބޭއްވި ނޫސްވެރިންގެ ބައްދަލުވުމެއްގައި އެސިޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވީ ފުލުހުން މައްސަލަ ތަހުގީގު ކުރަން ފެށީ ލިޔެކިޔުންތައް ސައްހަތޯ ބެލުމަށް ކަމަށެވެ.
ޕޯޓަލް މެދުވެރިކޮށް ލިޔުން ހޯދުމަށް ބިން ލިބުނު ފަރާތްތަކުން ހުށަހަޅަމުން އަންނަ އިރު އެ ލޮޓްތަކުގެ މައްސަލައިގައި އިތުރު ކަންކަން ފާހަގަވި ކަމަށް ވެސް އޭނާ ވިދާޅުވި އެވެ.
"ބިންވެރިޔާ ސްކީމުގެ ދަށުން ޝަރުތު ހަމަނުވާ ފަރާތްތަކުގެ ތެރެއިން ތިން ލޮޓެއްގެ މި ފަދަ މައްސަލައެއް ތަހުގީގުން ފާހަގަވެފައިވޭ. ބައެއް ލޮޓްތަކާ ގުޅިގެން އިމާރަތް ކުރުމުގެ ހުއްދަ ހޯދުމަށް ޕޯޓަލް މެދުވެރިކޮށް ލިޔުން ހުށަހަޅާފައި ވޭ. ލިޔުން ހުށަހަޅާފައިވާ އިރު، އެއް ފަރާތަށް ވުރެ ގިނަ ފަރާތްތަކުގެ ނަމުގައި ލިޔުން ހުށަހަޅާފައިވާ ކަން ވެސް ވަނީ ފާހަގަވެފައި،" ޝަރީފް ވިދާޅުވި އެވެ.
އެ ލިޔުންތައް ހުށަހެޅި ފަރާތްތަކާ ސުވާލުކުރިކަން ފާހަގަކުރައްވައި ޝަރީފް ވިދާޅުވީ އޭގެ ތެރެއިން ބައެއް ފަރާތްތަކާ ސުވާލުކުރުމުން އެ ފަރާތްތަކުން ހުށަހެޅި ލިޔުންތައް އެ މީހުންނަށް ދީފައި ވަނީ ކުރީގެ ސަރުކާރުގައި ކަމަށް ތަހުގީގަށް ބަޔާން ދީފައިވާ ކަމަށެވެ. އަދި އެ ލިޔުންތައް ދިނީ ޝަރުތު ހަމަނުވާ ކަމަށް ޝަކުވާ ހުށަހެޅުމުން އޭރުގެ ހައުސިން މިނިސްޓްރީގެ އިސް ފަރާތްތަކުން ބައްދަލުކޮށްފައި ކަމަށް ތަހުގީގަށް ބަޔާން ދީފައިވާ ކަމަށް ޝަރީފް ފާހަގަކުރެއްވި އެވެ.
ފުލުހުން އިތުރަށް ބުނީ އެ މީހުންގެ އަތުގައި ހުރި ލިޔުންތައް ތަހުގީގަށް ނަގައި މިހާރު ހައުސިން މިނިސްޓްރީއަށް ވެސް ގޮސް އެތަނުން ލިބެންހުރި ޑިޖިޓަލް ލިޔުންތައް ހޯދައި ތަހުލީލް ފަށާފައިވާ ކަމަށެވެ.
