ރާއްޖޭގައި ހަރަކާތްތެރިވާ ގޭންގުތަކާއި އެ ގޭންގްތަކުގެ ލީޑަރުންގެ އިތުރުން ގޭންގް ތަކުގައި ހަރަކާތްތެރިވާ މެމްބަރުން ކަނޑައެޅުމުގެ ބާރު ދޭން ކުރިން ބުނެފައިވާ ފަރާތްތައް އުނިކޮށް، ސީދާ ގާނޫނުން އެކަން ކަނޑައަޅަން ބިލުގައި ހިމަނަން ނިންމައިފިއެވެ.
ހޯމް މިނިސްޓްރީން ތައްޔާރުކުރި ބިލުގައި ކުރިން އޮތީ، ގޭންގްތަކާއި ގޭންގް ލީޑަރުން އަދި ގޭންގް މެމްބަރުން ކަނޑައެޅުމުގެ ބާރު މަތިކޮށްފައި ވާނީ، ހޯމް މިނިސްޓަރުގެ އިތުރުން ޕޮލިސް ކޮމިޝަނަރާއި ޗީފް އޮފް ޑިފެންސް ފޯސް އަދި ފުލުހުންގެ އިންޓެލިޖެންސްގެ ވެރިޔާ އާއި ސިފައިންގެ އިންޓެލިޖެންސްގެ ވެރިޔާ ހިމެނޭގޮތަށް ނަގާފައި އޮންނަ 5 މެމްބަރުންގެ ކޮމިޓީއަކުން ކަމަށެވެ. ނަމަވެސް، ހަމައެކަނި ކޮމިޓީއެއްގެ މައްޗަށް އެ ހުރިހާ ބާރެއް ދޫކޮށްނުލައި، މިހާރު ނިންމާފައި ވަނީ އެކަންކަން ގާނޫނުގައި ބަޔާން ކުރާގޮތަށެވެ. ސަބަބަކީ އެ ފަދަ ކޮމިޓީއަކުން އެގޮތަށް ނިންމާއިރު، ވަކި ސިޔާސީ ފިކުރަކުން ބޭނުންވާ ގޮތަށް ގޭންގުތަކާއި ގޭންގު ލީޑަރުން ކަނޑައެޅުމާއި ކަނޑަނޭޅިދާނެ ކަމުގެ ބިރު އޮތުމުންނެވެ.
ސަރުކާރުގެ ފަރާތުން މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސައިން ހުށަހެޅުއްވި ބިލްގައިވާ ގޮތުން، ކުށްކުރާ ގްރޫޕްތައް ނުވަތަ ގޭންގްތައް ހޯދަން ޖެހޭނީ ވެސް އާންމު އުސޫލުން ހިންގާ ތަހުގީގެއްގެ ތެރެއިންނެވެ. އެ ތަހުގީގުގެ ތެރެއިން ވަކި ގުރޫޕަކީ ކުށްކުރާ ބައެއް ކަން ނުވަތަ ވަކި މީހަކީ ކުށްކުރާ ގުރޫޕަކަށް ނިސްބަތްވާ މީހެއް ކަން ފުލުހުން ސާބިތުކޮށްދޭން ޖެހޭނީ އާންމު އުސޫލުން ހެކި ހޯދައިގެން ކަމުގައިވެސް ބުނެފައިވެއެވެ.
މި ބިލުގައި ބުނެފައި ވަނީ އެފަރާތަކީ ގޭންގެއްކަން ނުވަތަ ގޭންގެއްގެ ލީޑަރެއްކަން ނުވަތަ ގޭންގު މެމްބަރެއްކަން ކަނޑައެޅުމަށް ފަހު، އެފަދަ ފަރާތްތަކާ ވަކި ގުޅުން ތަކެއް ބާއްވައި މުއާމަލާތު ކުރުމާއި ކްލަބް ޖަމިއްޔާ ރަޖިސްޓްރީކޮށް ދިނުމަކީވެސް މަނާ ކަމެއް ކަމަށެވެ. ގޭންގް މީހުންނަކީ ކޮން ބައެއްކަން އާންމުންނާއި ރާއްޖެއިން ބައިނަލްއަގްވާމީ ޑިޕްލޮމެޓިކް ގުޅުން ގާއިމުކޮށްފައިވާ އެހެން ގައުމުތަކުގެ ގާނޫނު ތަންފީޒުކުރާ އިދާރާތަކަށް އެންގުމުގެ ބޭނުމުގައި އެ މީހުންގެ ފޮޓޯއާ އެކު މައުލޫމާތު އާންމު ކުރަން ޖެހޭނެ ކަމަށް ބިލުގައިވެއެވެ.
އެ ބިލުގައިވާ ގޮތުން ގޭންގް ތަކުގެ މީހުންގެ ލިސްޓް ކަމާގުޅޭ ދައުލަތުގެ އިދާރާތަކާއި ޑިޕްލޮމެޓިކް ގުޅުން ގާއިމް ކޮށްފައިވާ އެހެން ގައުމުތަކުގެ ގާނޫނު ތަންފީޒުކުރާ އިދާރާތަކަށް ހިއްސާކޮށް އަދި ކޮންމެ ހަ މަހަކުން އެއް ފަހަރު އެ ލިސްޓު މުރާޖައާ ކުރަންވެސް ޖެހޭނެއެވެ.
