ރާއްޖެއަށް ކުރިމަތި ވެފައިވާ މާލީ މައްސަލަތަކުގެ ސަބަބުން ރާއްޖެ ބަނގުރޫޓު ވެދާނެ ކަމަށް ބުނެ ބޭރުގެ ފަރާތްތަކުން މީގެކުރިން ދައްކަމުންދިޔަ ވާހަކަތައް މިހާރު ހުއްޓުމަކަށް އައިސްފައިވާ ކަމަށް މާލީ ވަޒީރު މޫސާ ޒަމީރު މިއަދު ވިދާޅުވެއްޖެއެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި މެމްބަރުން ވަޒީރާ ކުރެއްވި ސުވާލެއްގެ ޖަވާބުގައި ވިދާޅުވީ، ރާއްޖެއިން ދަރަނިތައް ދައްކަން އޮތް މުއްދަތު ތަކުގައި ދަރަނި ދައްކަން އުޅެފިނަމަ އައިއެމްއެފްގެ ރިޕޯޓުގައިވާ ގޮތަށް ރާއްޖެ ބަނގުރޫޓު ވެދާނެ ކަމަށެވެ. ނަމަވެސް ދައްކަން ހުރި ލޯނުތައް ފަސް ކުރެވި، ދައުލަތުގެ ޚަރަދުތައް ކުޑަކޮށް، ރާއްޖެ ބަނގުރޫޓު ވުމުގެ މަރުޙަލާއިން މިހާރު ސަލާމަތް ވެފައިވާ ކަމަށް މިނިސްޓަރު ވިދާޅުވިއެވެ.

"އެ ސިނާރިއޯއިން އިރާދަކުރެއްވިއްޔާ ރާއްޖެ ނެރެ ރިވެނިއު ސްޓްރީމްތައް ރަނގަޅުކޮށް އަދި އޭގެއިތުރުން ޚަރަދުތައް ރޭޝަނަލައިޒްކޮށް ހަމަ އެއާއެއްކޮށް އަޅުގަނޑުމެން ދައްކަންޖެހޭ ބައެއް ދަރަނިތަކުގެ މުއްދަތުތައް އިތުރުކޮށް ބައިލެޓްރަލީ މަސައްކަތް ކުރައްވައިގެން ރަހްމަތްތެރި ގައުމުތަކާއެކު މަސައްކަތް ކުރައްވައިގެން އެ ހުރިހާ ކަމެއް މިހާރު ހުރީ ހަމަޖެހިފައި،" މިނިސްޓަރު ވިދާޅުވިއެވެ.

ޒަމީރު ވިދާޅުވީ، އާ ސަރުކާރު އައިއިރު 124 ބިލިޔަން ރުފިޔާގެ ދަރަނި އޮތް ކަމަށެވެ. އޭގެތެރެއިން ދެބައިކުޅައެއްބަޔަކީ ކުރީގެ ސަރުކާރުގެ ދަރަނި ކަމަށްވެސް ވިދާޅުވިއެވެ. ދެން ހުރި ބަޔަކީ ރައީސް ޔާމީންގެ ސަރުކާރުގެ ދަރަނި ކަމަށް ވިދާޅުވިއެވެ.

"މިހާރު އަޅުގަނޑަކަށް ހިއެއް ނުވޭ އެއްވެސް ބަޔަކު ވާހަކަ ދައްކާހެނެއް، މިސާލަކަށް އިއްޔެ އައިއެމްއެފުންވެސް ރޭޓިން އެޖެންސީ ތަކުން ވާހަކަ ދެއްކިއިރުވެސް ބުނެފައި ހުންނާނެ ޚަރަދު ކުޑަކުރާށޭ، ޚަރަދު ކުޑަކުރާށޭ، އެކަމަކު ރާއްޖެ ބަނގުރޫޓުވުމާއި އިންސޯލްވެންސީއަށް ދިޔުމާ ދޭތެރޭގައި ވާހަކަ ދެއްކުން މިހާރު ހުއްޓިއްޖެ" ޒަމީރު ވިދާޅުވިއެވެ.