ރާއްޖެއަކީ މިހާރު ގާނޫނުތަކުގެ ބާރު އެއްވެސް ވަރަކަށް ނެތް ތަނެއް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފުން މިރޭ ބޭއްވި ޖަލްސާގައި، ގައުމުގައި ރައްޔިތުންގެ ބާރު ކެނޑި ގައުމުގައި ފީސަބީލިއްލާހި އުސޫލު އޮތްކަން ފާހަގަކުރައްވާ ޔާމީން ވިދާޅުވީ، ގާނޫނުގެ ވެރިކަން ރާއްޖޭގައި ހިނގާކަމާ މެދު ސުވާލު އުފެދޭ ކަމަށެވެ.
ޔާމީން ވިދާޅުވީ ދައުލަތުން ރައްޔިތުންގެ ހައްގުތަކަށް އަރައިގަންނަމުންދާ ކަން ފާޅުގައި ފެންނަމުންދާއިރު މި ގައުމުގައި ސަރުކާރުން ގާނޫނު ދަމަހައްޓަން މަސައްކަތްކޮށް ރޫލު އޮފް ލޯ ޕްރެކްޓިސް ކުރާ ކަމާ މެދު ސުވާލު އުފެދޭ ކަމަށެވެ.
"މި ސަރުކާރަކީ ގާނޫނު ދަމަހައްޓަން މަސައްކަތްކުރާ ސަރުކާރެއްތޯ، މި ގައުމުގައި މިހާރު ރުލް އޮފް ލޯ ނޫނީ ގާނޫނުގެ ވެރިކަން މި ގައުމުގައި ހިނގާތޯ؟ އެމްޑީއިން ގެންދަނީ އާމްދަނީއާ ނުބައްދަލު މުއްސަދިކަން ހޯދަމުން. އެހެންވީމަ އަޅުގަޑު ގަބޫލުކުރަނީ މިއީ މިހާރު ލޯ ލެސް ސޮސައިޓިއެއް ކަމަށް" ޔާމީން ވިދާޅުވި އެވެ.
ގާނޫނުތައް ބުރަ މަސައްކަތުން ހަދާފައި ހުރީ މިފަދަ މުކައްބަ ސަރުކާރެއް ދަމަހައްޓަން ނޫން ކަމަށް ޔާމީން ވިދާޅުވި އެވެ.
ޔާމީން ވިދާޅުވީ މިހާރު މި ސަރުކާރު ޖަވާބުދާރީ ކުރުވޭނެ އެއްވެސް ގޮތެއް ނެތް ކަމަށާ ޖަވާބުދާރީ ކުރުވަން ހުރި ހުރިހާ މަގެއް ރައްޔިތުންގެ މަޖިލިސް މެދުވެރިކޮށް ބަންދުކުރަމުން ގެންދާ ކަަމަށެވެ.
