ޣައްޒާގައި ހިންގަމުންދާ ލާއިންސާނީ ޖަރީމާއާއި ހަނގުރާމައިގެ ކުށްތަކުގައި އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ އާއި އިސްރާއީލުގެ ކުރީގެ ޑިފެންސް މިނިސްޓަރ ޔޯވް ގަލަންޓް އަދި ހަމާސްގެ އަސްކަރީ ވެރިޔާ ހައްޔަރުކުރުމަށް ބައިނަލްއަގްވާމީ ޖިނާއީ ކޯޓު (އައިސީސީ)ން ނެރުނު އަމުރި ރާއްޖޭންވެސް ތަންފީޒުކުރާނެކަަމަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެެވެ.
ނަތަންޔާހޫ ރާއްޖެ އަތުވެއްޖެނަމަ ހައްޔަރުކުރާނެތޯ ސުވާލުކުރުމުން ހޯމް މިނިސްޓަރު އިހްސާނު ހުންނެވީ ހަނުކަމަށް ބުނެ މީޑިއާއަކުން ޝާއިއުކުރި ޚބަރަކަށް ރައްދުދެއްވަމުން، އިހުސާން ވިދާޅުވީ، ދިވެހި ރާއްޖެއަކީ އިންޓަރނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާނުކޮށް ތަންފީޒުކުރާނެ ޤައުމެއްކަމަށެވެ.
އިޙްސާން މިހެން ވިދާޅުވެފައިވާއިރު، އައިސީސީގެ އަމުރުގައި ބުނެފައިވަނީ ނަތަންޔާހޫ އާއި ގަލަންޓް ވަނީ ޣައްޒާގެ އާންމު ރައްޔިތުންނާ ދެކޮޅަށް ގަސްތުގައި އެއީ އާންމު ރައްޔިތުންނަށް ރަނގަޅަށް އެނގިތިބެ އެމީހުންގެ ދިރިހުރުމަށް ހުރަސްއަޅާފައި ކަމުގައެވެ. އެގޮތުން ކާނާ އާއި ފެނާއި ބޭހާއި ކަރަންޓާއި ތެލާއި މިނޫންވެސް އިންސާނީ ޒަރޫރީތަކެތިން ޣައްޒާގެ އާންމު ރައްޔިތުން ގަސްތުގައި މަހުރޫމްކުރުވާފައިކަން ގަބޫލުކުރެވޭކަމަށެވެ.
އައިސީސީން ނެރޭ އަމުރެއް ތަންފީޒުކުރުމުގެ ބާރެއް ސީދާ އައިސީސީއަކަށް ނޯވެއެވެ. ނަމަވެސް އައިސީސީގެ މެމްބަރު ގައުމަކަށް މިފަދަ އަމުރެއް އޮންނަ މީހަކު ހިނގައްޖެނަމަ އެމީހަކު ހައްޔަރުކުރަން އެގައުމަކަށް ލާޒިމްވާނެއެވެ. އައިސީސީން ކޯޓު އަމުރު ނެރެފައިމިވަނީ ޣައްޒާގެ އިންސާނީ ހާލަތު ވަރަށް ބޮޑަށް ގޯސްވެފައިވާކަމަށް އދ ގެ އިންސާނީ ހައްގުތަކަށް މަސައްކަތްކުރާ ފަރާތްތަކުން ތަކުރާރުކޮށް ބުނަމުންދަނިކޮށެވެ.
