ސޮއިކުރާ ގޮތަށް، ބަދަލު ނުގެނެސް ޕްރޮޖެކްޓްތައް ކުރިއަށް ގެންދިއުމުގެ ފުރުސަތު ދެއްވުމަށް ރަށްރަށުގެ ކައުންސިލްތަކުގެ ކިބައިން، ކޮންސްޓްރަކްޝަން އެންޑް އިންފްރާންސްޓްރަކްޗާ މިނިސްޓަރު ޑރ. އަބުދުﷲ މުއްތަލިބު އެދިވަޑައިގެންފިއެވެ.
ރަށްރަށުގެ މަގު ހެރުމާއި ނަރުދަމާ އާއި، ބަނދަރު ހެދުމުގެ ކުރިއަށްގެންދާ ޕްރޮޖެކްޓްތައް ލަސްވަމުންދާ މައްސަލައިގައި، ރައްޔިތުންގެ މަޖިލީހުގެ މިއަދުގެ ޖަލްސާގައި ބައެއް މެންބަރުން ކުރެއްވި ސުވާލުތަކާ ގުޅިގެން މިނިސްޓަރު ވިދާޅުވީ ޕްރޮޖެކްތައް ލަސްވާން އެންމެ ބޮޑަށް ދިމާވާ އެއްމެ ބޮޑު އެއް މައްސަލަަކީ، އިރު އިރުކޮޅާ އެއަށް ބަަދަލު ގެނައުމަށް ކައުންސިލްތަކުން އެދެމުން ދިއުން ކަމަށެވެ.
"އަބަދު ވޭރިއޭޝަންތައް ގެންނަން އެދުމުން، އެ މަސައްކަތްކުރާ އެމްޓީސީއަށްވެސް ލިބެނީ ގެއްލުން ދައުލަތަށްވެސް ލިބެނީ ގެއްލުން އަދި، އެކަމަށް ބަޖެޓުގައި ޖަހައިފަ އޮންނަ އަދަދުން އެކަމެއްނުވޭ،"
މިނިސްޓަރު ވިދާޅުވީ، ޕްރޮޖެކްޓާބެހޭ ކޮންމެ ލިއުމެެއްގައި ކައުންސިލްތަކުން ސޮއިކުރަމުންދާ ކަމަށެވެ. ނަމަވެސް އެއަށްފަހު ދާއިރާގެ މެންބަރުން ލައްވާ އިރު އިރުކޮޅާ ޕްރޮޖެކްޓައް ބަދަލު ގެނެއުމަށް މަސައްކަތް ކުރަމުދާ ކަމަށްވެސް ވިދާޅުވިއެވެ.
މިނިސްޓަރު ވިދާޅުވީ، ފަސޭހަކަމާއެކު އަވަހަށް ޕްރޮޖެކްތްތައް ނިންމުމަށްޓަކައި ކައުންސިލްތަކުން ކުރަންޖެހޭ އެންމެ މުހިއްމު މަސަައްކަތަކީ ސޮއިކުރާ ގޮތަށް، ބަދަލެއް ނުގެނެސް ޕްރޮޖެކްޓްތައް ކުރިއަށް ގެންދިއުމަށް ފުރުސަތު ދިނުން ކަމަށެވެ.
