ސަރުކާރަށް މާލިއްޔަތު މެނޭޖްކުރަން ނޭނގުމުގެ ސަބަބުން ރައްޔިތުން ތަހައްމަލުކުރަން ޖެހިފައިވާ ދަތިތަކަށް ސަރުކާރު ޖަވާބުދާރީކުރުވަން ޖެހޭކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މި ސަރުކާރުގެ އަމާޒެއް ނެތް ކަމަށާއި މި ސަރުކާރަށް ގައުމުގެ ކަންކަން ހަމަމަގުން ހިންގަން ނޭނގޭ ކަމަށެވެ. ޝާހިދު ވިދާޅުވީ މި ސަރުކާރުގެ ނާގާބިލުކަމުން ސަބަބުންނާއި ހައިޖާނު ބޮޑުކޮށް ވަޒީފާއަށް މީހުން ނެގުމާއި ވަޒީފާއިން ވަކިކުރުމާއި، މިސްރާބެއް ނެތް ހާރިޖީ އަދި އިގްތިސޯދީ ސިޔާސަތުގެ ސަބަބުން ރައްޔިތުން އިގްތިސޯދީ ފުން އަނދަވަޅަކަށް ވެއްޓިފައިވާ ކަމަށެވެ.
ބޭންކް އޮފް މޯލްޑިވްސްގެ ކާޑުން ޑޮލަރު ނެގުން ލިމިޓްކުރުމާއި ގުޅިގެން ރާއްޖެއިން ބޭރުގައި ކިޔަވަމުންދާ ދަރިވަރުންގެ ޔުނިވަރސިޓީ/ކޮލެޖް ހަރަދުތަކާއި ދިރިއުޅުމުގެ ހަރަދުތައް ދެކޮޅުޖެއްސުމަށް ދަތިވާފައިވާ ކަމަށް ޝާހިދު ވިދާޅުވި އެވެ.
ރާއްޖެއިން ބޭރުގައި ކިޔަވަމުންދާ ދަރިވަރުންނަށް ޑޮލަރު ފޯރުކޮށްދެވޭނެ މަގެއް ނުހޯދައި، ގިނަ އަދަދެއްގެ ދަރިވަރުންނަށް ސްޓޫޑަންޓް ލޯނާއި، ސްކޮލާޝިޕް ދިނުމަކީ ސަރުކާރުގެ ސިޔާސަތުތަކެއް ނެތްކަމާއި، އިގްތިސޯދީ އަމާން އައްސޭރިއަކަށް ރާއްޖެ ގެންދިޔުމުގެ ޕްލޭނެއް ސަރުކާރުގެ ނެތްކަން ސާބިތުވާ ކަމެއް ކަމަށް ޝާހިދު ވިދާޅުވި އެވެ.
ސަރުކާރުގެ މިސްރާބު ސީދާކޮށް، ބޭރުގައި ތިބި ދަރިވަރުންނަށް ބޭނުންވާ ޑޮލަރު ލިބޭނެ ގޮތް މަގު ފަހިކުރުމަށް ޝާހިދު ވަނީ ސަރުކާރަށް ގޮވާލައްވައިފަ އެވެ.
