އިޒްރޭލުން ގައްޒާގައި ހިންގަމުންދާ އަނިޔާވެރި އަމަލުތަކާ ގުޅިގެން އިޒްރޭލުގެ ރައްޔިތުން ރާއްޖެ އަޔަނުދިނުމަށްޓަކައި އެ ގައުމުގެ ޕާސްޕޯޓް މަނާކުރުމުގެ ގޮތުން "ދިވެހިރާއްޖޭގެ އިމިގްރޭޝަން ގާނޫނު" އަށް އިސްލާހު ގެންނަން ހުށަހެޅި ބިލްގެ މަސައްކަތް އަވަސް ކުރުމަށްޓަކައި މާދަމާއިން ފެށިގެން ކަމާބެހޭ ފަރާތްތައް އެ ކޮމިޓީއަށް ހާޒިރުކުރަން ނިންމައިފިއެވެ.

އިދިކޮޅު އެމްޑީޕީގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް މަޖިލީހަށް ހުށަހެޅުއްވި މި ބިލު މަޖިލީހަށް ބަލައިގަނެ އިތުރަށް ދިރާސާކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އަށް ފޮނުވީ، މިދިޔަ ޖުލައި މަހުގެ 10 ވަނަ ދުވަހުއެވެ.

ނަމަވެސް އެ ބިލްގެ ފަހުން ކޮމިޓީއަށް ހުށަހެޅި ބިލްތައް ނިމުނިއިރު ވެސް އެ ބިލްގެ މަސައްކަތް ނުނިމި ލައްވާތީ ބިލް ހުށަހެޅި މެންބަރު މަޖިލީހުގެ ރައީސަށް ސިޓީ ފޮވުމުގެ އިތުރުން ބިލްގެ މަސައްކަތް އަވަސްކުރަން ގޮވާލާ މަޖިލީހަށް ގަރާހު ހުށަހަޅައި ކުރިއަށް ގެންދިޔަ މަސައްކަތްތަކުގެ ސަބަބުން ބިލް ކޮމިޓީއަށް ފޮނުވިތާ ފަސް މަސް ދުވަސް ފަހުން މިމަހު 11 ގައި ކޮމިޓީގައި ފެށިއެވެ.

އެދުވަހު އޮތް ކޮމިޓީ ބައްދަލުވުމުގައި ފާސްކުރީ ބިލުގެ މަސައްކަތް އަންނަ އަހަރުގެ ފެބްރުއަރީމަހުގެ ނިޔަލަށް ނިންމުމަށެވެ. ނަމަވެސް އެ މަސައްކަތް އަވަސް ކުރުމަށް ކަމަށް ވިދާޅުވެ 241 ކޮމިޓީގެ ބައްދަލުވުމެއް މިއަދު ވަނީ ބާއްވައިފައެވެ.

އެ ބައްދަލުވުމުގައި ކޮމިޓީގެ މުގައްރިރު އޭދަފުށީ ދާއިރާގެ މެންބަރު އަހުމަދު ސަލީމް މިއަދު ވިދާޅުވީ، ބިލް ދިރާސާ ކުރުމަށްޓަކައި، ކޮމިޓީއަށް ހާޒިރުކުރަންޖެހޭ ފަރާތްތަކަށް، އަންނަ ޑިސެމްބަރުމަހުގެ ނިޔަލަށް ސިޓީ ފޮނުވައި އެމީހުން ފޮނުވާ ޖަވާބެއްގެ މައްޗަށް ބެލުމަށްފަހު، ކޮމިޓީއަށް އެމީހުން ކޮށްގެން ކުރިއަށް ގެންދާގޮތަށް އޮތުމުން ބިލްގެ މަަސައްކަތް ލަސްވާ ކަމަށެވެ.

ނަމަވެސް ބިލް އަވަސްކުރުމަށް ގޮތެއް ނިންމުން އޮތީ މީގެކުރިން ކޮމިޓީން ފާސްކޮށްފައިއޮތް ގޮތް ބަދަލުކޮށްގެން ކަމަށްވެސް ވިދާޅުވިއެވެ. އެގޮތުން ބިލްގެ މަސައްކަތް އަވަސްކުރުން އޮތް ވިސްނުމަކީ، ބިލް ދިރާސާ ކުރުމަށްޓަކައި ކޮމިޓީއަށް ހާޒިރުކުރަން ލިސްޓް ކޮށްފައިވާ ފަރާތްތައް މާދަމާއިން ފެށިގެން ހާޒިރުކުރަމުން ގެންދިއުން ކަމަށްވެސް ވިދާޅުވިއެވެ.

މުގައްިރރުގެ އެ ހިޔާލާއެކު، މާދަމާއިން ފެށިގެން ކަމާބެހޭ ފަރާތްތައް ކޮމިޓީއަށް ހާޒިރުކުރަން ހުށަހެޅުއްވީ، ހުޅުދޫ ދާއިރާގެ މެންބަރު މުހައްމަދު ޝާހިދުއެވެ. ތާއީދު ކުރެއްވީ ކެލާ ދާއިރާގެ މެބްބަރު އަބުދުﷲ ޝަރީފްއެވެ. އެ ހުށަހެޅުން ފާސްވުމާ ގުޅިގެން މާދަމާ ކޮމިޓީ ބައްދަލުވުން ކުރިއަށްގެންދަން މުގައްރިރު ނިންމެވިއެވެ.