އެ މަނިކުފާނުގެ އަމާޒަކީ މަސްތުވާތަކެތީގެ ވަބާއިން ދިވެހި މުޖުތަމައު އެއްކޮށް ސަލާމަތްކުރުން ކަމަށް ރައީސް ޑރ.މުހައްމަދު މުއިއްޒު މިރޭ ވިދާޅުވެއްޖެ އެވެ.

ރައީސް އެގޮތަށް ވިދާޅުވީ ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ އުޅުނު ސްރީލަންކާގެ ބޯޓަކުން 468 ކިލޯގެ މަސްތުވާތަކެތި އަތުލައިގަތުމާ އެކު، އެ މަނިކުފާނު އެކްސްގައި ކުރެއްވި ޕޯސްޓެއްގަ އެވެ.

އެގޮތުން ރައީސް ވިދާޅުވީ ދިވެހިރާއްޖެ މަސްތުވާތަކެތިން އެއްކޮށް ސަލާމަތް ކުރުމަކީ އެންމެ އިސްކަންދޭ އެއް ކަންތައްކަމަށެވެ. ރައީސް އިތުރަށް ވިދާޅުވީ ގާނޫނު ތަންފީޒުކުރާ މުއައްސަސާތަކުން، ދާއިރާއިން ކުރަމުން ގެންދާ ބުރަ މަސައްކަތް ފާހަގަކޮށް އެ ފަރާތްތަކަށް ޝުކުރު ދަންނަވާކަމަށެވެ.

މިކަމާ ގުޅިގެން ފުލުހުން މިއަދު ހަވީރު އިސްކަންދަރުކޮށީގައި ބޭއްވި ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރު އަލީ ޝުޖާއު ވިދާޅުވީ ހދ. މަކުނުދޫގެ ބޭރުން ލަންކާ މަސް ބޯޓެއް އެމްއެންޑީއެފްގެ ކޯސްޓު ގާޑުން ހިފެހެއްޓީ ރޭ ދަންވަރު 12:45 ހާއިރު ކަމަށެވެ. އެމްއެންޑީއެފަށް ލިބުނު އިންޓެލިޖެންސް މައުލޫމާތަކާ ގުޅިގެން ހިފެހެއްޓި އެ ބޯޓުގައި ތިބީ ލަންކާގެ ފަސް ފިރިހެނުންކަމަށާއި ކޯސްޓުގާޑާއި ފުލުހުން ގުޅިގެން އެ ބޯޓު ވަނީ މިއަދު ހެނދުނު ހދ. ކުޅުދުއްފުށީ ބަނދަރަށް ގެންގޮސްފައިކަމަށެވެ.

ކުޅުދުއްފުށީ ޕޮލިސްގެ ފުލުހުން އެ އުޅަނދު ބަލައި ފާސްކުރުމުން ޖުމްލަ 468.6 ކިލޯގެ މަސްތުވާތަކެތި ކަމަށް ޝައްކުކުރެވޭ އެއްޗެހި ވަނީ ފެނިފައިކަމަށާއި އެ ތަކެތީގެ ފުރަތަމަ މަރުހަލާގެ ޓެސްޓުތަކުން ދައްކާ ގޮތުގައި، އޭގެ ތެރޭގައި 344 ކިލޯގެ މެތު އާއި 124.6 ކިލޯގެ ކޮކެއިން ހިމެނެއެވެ. އަދި އެ ތަކެތީގެއަގަކީ އެއް ބިލިއަން ރުފިޔާކަމަށް ވެސް ސީޕީ ޝުޖާއު ވިދާޅުވި އެވެ.