ޤާނޫނުއަސާސީއަށް ގެނައި އިސްލާޙުތަކާއެކު ރާއްޖެ ނުރައްކަލަށް ވެއްޓިފައިވާ ކަމަށާއި، މިއީ ރައްޔިތުންގެ މަޖިލީހުގެ ހުރިހާ މެމްބަރުންވެސް ވަކިފިކުރަކަށް ބެލުމެއް ނެތި، އެއްއަޑަކުން ނޫނެކޭ ބުނެ، ރާއްޖެ ސަލާމަތް ކުރަންވީ ވަގުތު ކަމަށް ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އަޙްމަދު އަބްދުﷲ ވިދާޅުވެއްޖެއެވެ.
އެމްޑީޕީން ރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން އަޙްމަދު ވިދާޅުވީ، ޤާނޫނުއަސާސީގައިވާ ގޮތުގެ މަތިން މެމްބަރުން އިންތިޚާބު ވެފައި ވަނިކޮށް، ގޮނޑި ގެއްލޭ އިސްލާޙު ގެނައިއިރު، ކޮންމެ ދިވެހި ރައްޔިތަކަށްވެސް އެމީހަކު ބޭނުން ސިޔާސީ ފިކުރަކަށް މަސައްކަތް ކުރުމުގެ ހައްގު ޤާނޫނުއަސާސީން ދީފައިވާ ކަމަށެވެ.
"އެ މާއްދާ މިއަދުވެސް އެބައޮތް ޤާނޫނުއަސާސީގައި. އޮއްވާ އަނެއްކާ މިދެންނެވި ގޮތަށް މިކަންކުރީމާ ދެން އެއަށް އަމަލު ކުރަން ނުޖެހޭނެ ކަމަށް މިއަދު ޝަރުއީ ދާއިރާގައި ތިއްބެވި ވަރަށްގިނަ ބޭފުޅުންވެސް އެބަ ވިދާޅުވޭ. ހަމައެއާއެކު، ކުރީގެ އުއްތަމަ ފަނޑިޔާރު ކަމަށް އައްޔަން ކުރި ބޭފުޅުންވެސް މިއަދު އެ ވާހަކަ ވަރަށް ސާފުކޮށް ވިދާޅުވެއްޖެ. މިދެންނެވި ގޮތަށް އެކަން ނުކުރެވޭނެ ކަމަށާއި، އެއީ ސައްޙަ ނިންމުމެއް ކަމަށް ނުބެލެވޭނެ ކަމަށް" އަޙްމަދު ވިދާޅުވިއެވެ.
އަޙްމަދު ވިދާޅުވީ، ސަރުކާރުގެ ވިސްނުމަކީ، ރައްޔިތުންގެ މަޖިލީހުގެ މެމްބަރުންގެ ކަރުގައި ވާގަނޑެއް އެއްސެމަށްފަހު، ބޭނުންއިރަކު ދަމާފަ ބޭނުން އިރަކު ބާރު ކޮށްލުން ކަމަށެވެ. އޭނާ ވިދާޅުވީ އެތައް ބަޔަކު އެތައް ދަލެއް އޮހޮރުވައިގެން ގެނައި ޤާނޫނުއަސާސީއާއެކު ތިންބާރު ވަކިކުރި ނަމަވެސް، ރައީސް މުއިއްޒު ހީފުޅުކުރައްވަނީ ތިންބާރުވެސް މިހާރު އޮތީ ރައީސްގެ އަތްޕުޅުގައި ކަމަށެވެ.
"ވެރިކަމުގެ ބާރާ، އަދުލްއިންސާފު ގާއިމް ކުރުމުގެ ބާރާ، ޤާނޫނު ހެދުމުގެ ބާރު. މިއީ މިނިވަން ތިންބާރު. އެއްބާރު އަނެއް ބާރު މައްޗަށް ފާރަވެރި ވެގެން ހިންގާގޮތަށް ފަރުމާ ކުރެވިފައި އޮތް ޤާނޫނުއަސާސީއެއް ދިވެހިރާއްޖޭގައި އޮންނާނީ" އަޙްމަދު ވިދާޅުވިއެވެ.
އޭނާ ވިދާޅުވީ، އެހެން އޮތަސް ޤާނޫނުއަސާސީއަށް ގެނައި ބަދަލާއެކު ހުރިހާ ބާރެއް އެކުވެއްޖެ ކަމަށް ޕީއެންސީން ނިންމައިގެން ތިބި ކަމަށެވެ. އޭނާ ވިދާޅުވީ ޤާނޫނުއަސާސީއަށް ގެނައި ބަދަލާއެކު ޝަރުއީ ނިޒާމުވެސް މިހާރު ނުރައްކަލެއްގެ ތެރެއަށް ވެއްޓިފައިވާ ކަމަށެވެ.
"މާދަމާ ބުނަންވީ ފަނޑިޔާރުންގެ މައްސަލަ ވައްދާފަ، މި މައްސަލައަށް މިހެން ހަދާށޭ، އެހެން ހަދާށޭ، ބުނީމަ އެކަމާދެކޮޅު ހަދައިފިއްޔާ އެއްކަލަ މަޖިލީހަށް (ސިޔާސީ ޕާޓީގެ ފިޔަވަޅުއަޅާ މަޖިލިސް) އަންގާނީ މިހާރުން މިހާރަށް އޭނަ ވަކިކުރާށޭ. ވަކިކުރަން ދެކޮޅުހަދާ މެމްބަރު ކަނޑާލީމަ ގޮނޑި ގެއްލުނީ" އަޙްމަދު ވިދާޅުވިއެވެ.
