ސަރުކާރަށް ވަރަށް ބޮޑަށް ފާޑު ކިޔާ އެކްސް އެކައުންޓެއް ކަމަށްވާ "ހަސަން ކުރުސީ"އަށް މައުލޫމާތު ދިން ބަޔަކު ހޯދަން ވެގެން ފުލުހުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ބަލައި ފާސްކޮށްފިއެވެ.
ފުލުހުން މިރޭ ބުނީ ކުރުސީއަށް މައުލޫމާތު ދިން މުވައްޒަފެއް ދެނެގަތުމަށް އެދި އެ އިދާރާއަށް މައްސަލަ ހުށަހެޅީ އެމްްއެމްއޭއިން ކަމަށެެވެ.
"އެއީ އެ އޮތޯރިޓީގެ މުވައްޒަފެއްގެ ޒާތީ މައުލޫމާތު ތަކެއް ލީކްވި މައްސަލައެއް. އެކަން އެމްއެމްއޭއިން ހުށަހެޅުމުން، ފުލުހުން ދަނީ އެކަން ބަލަމުން،" ފުލުހުން ބުންޏެވެ.
"މާލޭ ޓައިމްސް" އަށް އެނގިފައިވާ ގޮތުގައި ފުލުހުން ގުޅިގެން ބަލަމުން ދަނީ "ހަސަން ކުރުސީ" އެކައުންޓުން އެމްއެމްއޭގެ މެނޭޖިން ޑިރެކްޓަރުގެ މަގާމަށް މި ފަހުން އައްޔަން ކުރި މަރިޔަމް ރަޝްފާ އާ ގުޅޭގޮތުން ކުރި ޕޯސްޓެއްގެ މައްސަލައެވެ. އެ ޕޯސްޓުގައި ބުނެފައިވަނީ ރަޝްފާއަށް އެ މަގާމު ލިބުނީ ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު އާ އޮތް ގުޅުމެއްގެ ސަބަބުން ކަމަށެވެ.
ރަޝްފާ އެމްއެމްއޭގައި ވަޒީފާ އަދާކުރިއިރު އެ އިދާރާގެ އެޗްއާރު އިން އޭނާއަށް ފޮނުވި އިންޒާރުގެ ސިޓީއެއްގެ ކޮޕީއެއްވެސް ކުރުސީ އެކައުންޓުން ވަނީ ޕޯސްޓު ކޮށްފައެވެ.
ފުލުހުން އިއްޔެ އާއި މިއަދު ވަނީ އެމްއެމްއޭއަށް ވަދެފަ އެވެ. އަދި ވަނީ ބައެއް މުވައްޒަފުންފެ ލެޕްޓޮޕްތައް ފުލުހުންގެ ބެލުމުގެ ދަށަށް ގެންގޮސްފައެވެ.
