ރައްޔިތުންގެ މަޖިލިސް މެންބަރުން ޕާޓީ ބަދަލުކޮށްފި ނަމަ، އަދި ޕާޓީން މެމްބަރަކު ވަކިކޮށްފިނަމަ، ގޮނޑި ގެއްލޭގޮތަށް ޤާނޫނު އަސާސީއަށް ގެނައި އިސްލާހުގެ ސަބަބުން މިހާރު އޮތް ރައްޔިތުންގެ މަޖިލީހުގެ ސައްހަކަމާ މެދު ސުވާލު އުފެދޭ ކަމަށް އެމްޑީޕީގެ ރައީސް އަބުދުﷲ ޝާހިދު ވިދާޅުވެއްޖެއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޝާހިދު ވިދާޅުވީ، އަވަސް އަރުވާލައިގެން ރައްޔިތުންގެ ޚިޔާލެއް އަދި ކަމާބެހޭ އެއްވެސް ފަރާތެއްގެ ޚިޔާލެއް ހޯދުމަކާ ނުލައި 10 ގަޑިއިރުގެ ތެރޭގައި ޤާނޫނުއަސާސީއަށް އެ އިސްލާހު ގެނައުމުން، ޚުދުމުހުތާރުކަން އިސް ކުރުމުގެ އިތުރުން ޖަވާބު ބޭނުންވާ ޤާނޫނީ ސުވާލު ތަކެއްވެސް އުފެދިފައިވާ ކަމަށެވެ.

ޤާނޫނުއަސާސީގެ 75 ވަނަ މާއްދާ އަށް އިޝާރަތް ކުރައްވައި، ޝާހިދު ވިދާޅުވީ، އެ މާއްދާގައި ބުނާގޮތަށް މަޖިލިސް މެންބަރުން ދެން އަމަލު ކުރާނީ ކޮން ގޮތަކަށްތޯ، އުފެދިފައިވާ ސުވާލަށް މަޖިލީހުން ޖަވާބު ދޭންޖެހޭ ކަމަށެވެ. އެހެން ނޫންނަމަ ޤާނޫނުސާސީއަށް އަމަލު ކުރަން މެންބަރުންނަށް ހުރަސްތަކެއް ދިމާވާނެ ކަމަށްވެސް ޝާހިދު ވިދާޅުވިއެވެ.

ޤާނޫނުއަސާސީގެ 75 ވަނަ މާއްދާގައި ބުނަނީ، މަޖިލިސް މެންބަރުން އަމަލު ކުރަންވާނީ ގައުމީ މަސްލަހަތާއި ރައްޔިތުންގެ ލާބަ އާއި މަންފާއަށް އިސްކަންދީގެން ކަމަށާއި އެއްވެސް މެންބަރަކު، އެމީހެއްގެ ނުވަތަ އެމީހަކާ ޚާއްސަ ގުޅުމެއް އޮތް އެހެން މީހެއްގެވެސް ޒާތީ މަސްލަހަތެއް ކުރިއަރުވަން މަގާމުގެ ބޭނުންކޮށްގެން ނުވާނެ ކަމަށެވެ. އަދި މަޖިލިސް މެންބަރުން އިންތިޚާބުވި ދާއިރާތައް ތަމްސީލު ކުރުމުގައި، މުޅި ގައުމާއި ހުރިހާ ރައްޔިތުންގެ ލާބަ އާއި މަންފާއަށް ރިއާޔަތް ކުރަންވާނެ ކަމަށްވެސް ބުނެފައިވެއެވެ.

ނަމަވެސް އިއްޔެ ޤާނޫނުއަސާސީއަށް ގެނައި އިސްލާހުގައި ބުނާ ގޮތުން މެންބަރުން މަސައްކަތް ކުރަން ޖެހޭނީ ޕީއެންސީން ބުނާ ގޮތަށް އެކަނި ކަމަށާއި އެނޫން ގޮތަކަށް މަސައްކަތްކޮށްފިއްޔާ ގޮނޑި ގެއްލޭނެ ކަަމަށްވެސް ޝާހިދު ވިދާޅުވިއެވެ.

ޝާހިދު ވިދާޅުވީ، 2008 ގައި ޤާނޫނުއަސާސީ އިސްލާހު ވެގެން އައިއިރު، އޭރު ހިނގަމުން އައި ރައްޔިތުންގެ މަޖިލީހުގެ ފަސް އަހަރުގެ ދައުރު ނުނިމެނީސް އަލުން ރައްޔިތުންގެ މަޖިލީހުގެ އިންތިޚާބު 2009 ގައި ބާއްވާ ގޮތަށް ޤާނޫނުއަސާސީގައި ކަނޑައެޅީ، ރައްޔިތުންގެ މަޖިލީހަށް އަސަރުކުރާ ފަދަ ބަދަލުތަކެއް ޤާނޫނުއަސާސީން ގެނައުމުން، އޭރު ތިއްބެވި މެންބަރުންނާއެކު ކުރިއަށް ނުދާނެ ކަމާއި އެ މެންބަރުން އިންތިޚާބުވެފައި އޮތީ ކުރީގައި އޮތް ޤާނޫނު އަސީސީއަކުން ކަމަށްވާތީ އަލުން ރައްޔިތުންގެ މަޖިލިސް މެމްބަރުން އިންތިޚާބު ކުރަން ޖެހިގެން ކަމަށެވެ.

"އިއްޔެ މިގެނައި ބަދަލުތަކާއެކީ އަލުން އަޅުގަނޑުމެންނަށް ކުރިމަތިވާ ސުވާލަކީ މިހާރު ތިއްބެވި މަޖިލީހުގެ މެންބަރުން، އެ މެންބަރުންގެ މައްޗަށް މި ބަދަލުތައް ހިނގާނެތޯ ނުވަތަ ނޫންތޯ، ނުހިނގާނަމަ އެއީ ކީއްވެގެންތޯ، ހިނގާނަމަ އެއީ ކީއްވެގެންތޯ، އެ ބޭފުޅުން އިންތިޚާބުވެގެން އައީ މި މާއްދާނެތް ޤާނޫނުއަސާސީއެއްގެ ދަށުން،" ޝާހިދު ވިދާޅުވިއެވެ.

ޝާހިދު ވިދާޅުވީ ޤާނޫނުއަސާސީއަށް އިއްޔެ ގެނައި އިސްލާހާ ގުޅިގެން އުފެދޭ އެންމެ ބޮޑު ސުވާލަކީ މިހާރު މިއޮތް ރައްޔިތުންގެ މަޖިލީހުގެ ލެޖިޓީމެސީ، މި ބަދަލާއެކު އެބައޮތްތޯ، ކުރެވޭ ސުވާލު ކަމަށެވެ. އަލުން ރައްޔިތުންގެ މަޖިލީހެއް އިންތިޚާބު ކުރަން ވެއްޖެތޯ އެއީ އުފެދޭ ސުވާލެއް ކަމަށްވެސް ވިދާޅުވިއެވެ.

"މަޖިލީހުގެ ބާކީ އޮތް ހުރިހާ ދުވަހަކަށް ރައްޔިތުންގެ ބަޔަލު ސުވާލު ކުރަމުންދާނެ ޤާނޫނުއަސާސީއަށް އިއްޔެ ގެނައި ބަދަލާ ގުޅިގެން ޤާނޫނުއަސާސިއަކު ނެތޭ ބުނެފައެއް މިހާރު މިއޮތް މަޖިލިސް ދެމި އޮންނާނެއެކޭ، އެހެން ކަމުން މިހާރު މިއޮތް މަޖިލީހުގެ ޤާނޫނީ ހައިސިއްޔަތެއް ނެތޭ، އެސުވާލު ތަކުގެ ޖަވާބު ރައްޔިތުންނަށް ބޭނުންވޭ،" ޝާހިދު ވިދާޅުވިއެވެ.