ރާއްޖެ އަންނަ އިޒްރޭލުގެ ރައްޔިތުންގެ ޕާސްޕޯޓް މަނާ ކުރުމަށްޓަކައި ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލުގެ މަސައްކަތުގެ ތެރެއިން ފަތުރުވެރިކަމުގެ ދާއިރާއާ ގުޅުން ހުރި ހުރިހާ އިދާރާތަކާއި، ރާއްޖޭގެ ހުރިހާ ސިޔާސީ ޕާޓީތަކާ ބައްދަލުކޮށް މަޝްވަރާ ކުރަން ރައްޔިތުންގެ މަޖިލީހުގެ ގައުމީ ސަލާމަތާބެހޭ 241 ކޮމިޓީން މިއަދު ނިންމައިފިއެވެ.

ކަމާގުޅުން ހުރި ދާއިރާގެ ހުރިހާ އިދާރާތަކާއި ރާއްޖޭގައި ރަޖިސްޓްރީ ކޮށްފައިވާ ހުރިހާ ސިޔާސީ ޕާޓީތަކާ ބައްދަލުކޮށް އެކަމުގައި މަޝްވަރާ ކުރަން 241 ކޮމިޓީން މިއަދު ނިންމިއިރު، އެ ލިސްޓުގައި ހިމެނެނީ ހުރިހާ ސިޔާސީ ޕާޓީތަކާއި، އެޓާރނީ ޖެނެރަލްގެ އޮފީހާއި އިކޮނޮމިކް މިނިސްޓްރީ އާއި ޓޫރިޒަމް މިނިސްޓްރީ އާއި އިމިގްރޭޝަނާއި މަޓީ އާއި އެހެނިހެން އެންޖީއޯތަކެވެ. އަދި ރާއްޖެ އަންނަ އިޒްރޭލްގެ ފަތުރުވެރިންނާއި އެހެނިހެން ބޭނުމުގައި އަންނަ އިޒްރޭލު މީހުންނާ ގުޅޭ މައުލޫމާތުތައް ހޯދުމަށް ކަމާބެހޭ އިދާރާތަކަށް ހުށަހެޅުމަށްވެސް ކޮމިޓީން މިއަދު ވަނީ ނިންމާފައެވެ.

މި ބިލަކީ އެމްޑީޕީގެ މެމްބަރު، ގަލޮޅު ދެކުނު ދާއިރާގެ މީކާއިލް އަހުމަދު ނަސީމް ހުށަހެޅުއްވި ބިލެކެވެ.