ދައުލަތަށް އެންމެ ގިނައިން ޓެކްސް ފައިސާ ދައްކަމުންދާ ބޮޑެތި ވިޔަފާރިވެރިންނާ "މައްލަވަ" ނުކުރުމަށް ޕީއެންސީގެ ޕީޖީ ގްރޫޕުގައި ހިމެނިވަޑައިގަންނަވާ މަހިބަދޫ ދާއިރާގެ މަޖިލިސް މެންބަރު އަހުމަދު ތޯރިގު ގޮވާލައްވައިފި އެވެ.

ރާއްޖޭގެ ބޭންކުތަކަށް ޑޮލަރު މާރުކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް އަމަލުކުރެވެން ނެތް ކަމަށް ގިނަ ވިޔަފާރިވެރިން އެމްއެމްއޭއަށް އެންގުމާ ގުޅިގެން ޕީއެންސީގެ އެކްޓިވިސްޓުންނާއި އެ ޕާޓީގެ ޕީޖީ ގްރޫޕުގެ ބައެއް މެންބަރުން ދަނީ ވިޔަފާރިވެރިންނަށް އަމާޒުކޮށް ވަރަށް ބޮޑަށް ފާޑު ވިދާޅުވަމުންނެވެ.

މަޖިލީހުގައި މިއަދުކުރިއަށް ދިޔަ ބަޖެސް ބަހުސްގައި ވާހަކަދައްކަވަމުން ތޯރިގު ވިދާޅުވީ މިވަގުތު ރާއްޖޭގެ އިގުތިސާދީ އަދި މާލީ ހާލަތު އޮތީ ވަރަށް ގޯސްކޮށް ކަމަށެވެ. އެހެން ކަމުން ޑޮލަރުގެ މައްސަލައާ މެދު ވިސްނާލަން ޖެހޭ ކަމަށް ވެސް އޭނާ ވިދާޅުވި އެވެ.

"އަޅުގަނޑުމެންގެ އެކުވެރި ރައްޔިތުންގެ މަޖިލީހުގެ މެންބަރުންނާ އަދި އަޅުގަނޑުމެންގެ ޕާޓީ، ޕީއެންސީއަށް އަދި މި ސަރުކާރަށް ނިސްބަތްވާ ހުރިހާ ސިޔާސީ ފަރާތްތަކާ އަދި ޕާޓީގެ އެކްޓިވިސްޓުންނަށް އަޅުގަނޑު ގޮވާލަން، އަޅުގަނޑުމެންގެ ގައުމުގެ ބޮޑެތި ވިޔަފާރިވެރިންނަށް ބަދުބަސް ބުނުން ހުއްޓާލަން،" ތޯރިގު ވިދާޅުވި އެވެ.

އެގޮތުން ތަފާތު ނަންތަކުން އެ ވިޔަފާރިވެރިންނާ މުހާތަބުކޮށް، ސޯޝަލް މީޑިއާގައި ހަޖޫ ޖެހުން ހުއްޓާލަން ޖެހޭ ކަމަށާއި ރާއްޖޭގެ އިގުތިސާދު އޮތީ ރަނގަޅު ހާލަތެއްގައި ނޫން ކަމަށް ވެސް ޕީއެންސީގެ ޕީޖީ ގްރޫޕުގެ ޑެޕިއުޓީ ލީޑަރުކަން މީގެ ކުރިން ކުރެއްވި މެންބަރު ތޯރިގު ވިދާޅުވި އެވެ.

"ރާއްޖޭގެ އިގުތިސޯދު އޮތީ ރަނގަޅު ހާލަތެއްގައެއް ނޫން. ހަގީގަތަކީ އެއީ. ރާއްޖޭގެ މާލީ ކަންތައްތައް އޮތީ ރަނގަޅު ހިސާބަކު ނޫން. ރާއްޖޭގަ ތިބި ފުންނާބު އުސް ވިޔަފާރިވެރިންނާ އަޅުގަނޑުމެން ސިޔާސީ ގޮތުން ދިމާކުރުމަކީ އެންމެ ރަނގަޅު ގޮތަކަށް ނުވާނެ،" ތޯރިގު ވިދާޅުވި އެވެ.

އޭނާ އަކީ މިވަގުތު މަޖިލީހުގައި ތިއްބެވި ޕީއެންސީ ކޯލިޝަނުގެ މެންބަރުންގެ ތެރެއިން އެންމެ ތަޖުރިބާކާރު އެއް މެންބަރެވެ. މިއީ އޭނާ މަޖިލީހުގައި އަދާކުރައްވާ ތިންވަނަ ދައުރެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން ބޭރު ފައިސާގެ ގަވާއިދަށް ބަދަލު ގެނައީ އޮކްޓޯބަރު 1، ގަ އެވެ. މި ގަވާއިދަށް އަމަލުކުރަން ފަށަނީ ޖެނުއަރީ 1، 2025 އިން ފެށިގެންނެވެ.