ހުޅުމާލޭން މަސްތުވާތަކެއްޗާއެކު ހައްޔަރުކުރި އުމުރުން ދުވަސްވީ މީހާއަކީ މަސްތުވާތަކެތީގެ ވިޔަފާރިކުރި މައްސަަލައަކާ ގުޅިގެން 25 އަހަރަށް ޖަލައިލައިފައި ހުއްޓާ ގޭބަންދަށް ބަދަލުކޮށްފައިވާ މީހެއް ކަމަށް ފުލުހުބް ބުނެފި އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ޑްރަގް އެންފޯސްމެންޓުގެ ހެޑް، ސުޕްރިޑެންޓް އޮފް ޕޮލިސް، ނާހިދު ހުސެއިން ވިދާޅުވީ، ކޯޓު އަމުރެއްގެ ދަށުން އޭނާ ދިރިއުޅެމުން ދިޔަ އެޕާޓްމެންޓަށް ވަދެ، އޭނާގެ ހަށިގަނޑު ބަލައި ފާސްކުރިއިރު، މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ޖުމްލަ 13 ރަބަރު ޕެކެޓް ފެނިފައިވާ ކަމަށާއި އަދި އޭނާ ދިރިއުޅެމުން ދިޔަ ތަނުން މަސްތުވާތަކެތި ކަމަށް ޝައްކު ކުރެވޭ 8 ރަބަރު ޕެކެޓް ފެނިފައިވާ ކަމަށެވެ.
ނާހިދު ވިދާޅުވީ، އޭނާ އަކީ މީގެ ކުރިން ވެސް މަސްތުވާތަކެތީގެ މައްސަލަތަކުގައި ދައުވާކޮށް ހުކުމް ކޮށްފައިވާ މީހެއް ކަމަށެވެ. އެގޮތުން 2016 ވަނަ އަހަރު މަސްތުވާތަކެތީގެ ޑައިމޯފިން ޓްރެފިކް ކުރުމުގެ މައްސަލައެއްގައި ކްރިމިނަލް ކޯޓުގައި ދައުވާ ކުރެވި، 17 މާޗް 2019 ވަނަ އަހަރު ދައުވާ ސާބިތުވާ ކަމަށް ކަނޑައަޅައި، އުމުރު ދުވަހަށް ޖަލަށްލާފައި ހުރި މީހެއް ކަމަށެވެ. އެ ހުކުމް 6 އޮކްޓޯބަރު 2022 ގައި ހައިކޯޓުން ދަހަމަހައްޓާފައިވާ ކަމަށް ނާހިދު ވިދާޅުވިއެވެ.
"މިމައްސަލައިގައި ހުކުމް ތަންފީޒު ކުރަމުން ދަނިކޮށް 8 ޖުލައި 2021 ވަނަ ދުވަހު އޭނާ ވަނީ ގޭބަންދަށް ބަދަލުކޮށްފަ." ނާހިދު ވިދާޅުވިއެވެ.
އޭގެ އިތުރުން ވެސް 2023 ވަނަ އަހަރު ޑައިމޯފިން ޓްރެފިކް ކުރުމުގެ އިތުރު މައްސަލައެއްގެ ޝަރީއަތް ހުޅުމާލޭ ކޯޓުގައި މިހާރު ވެސް ހިނގަމުން އަންނަ ކަމަށް ނާހިދު ވިދާޅުވިއެވެ.
އަންގާރަ ދުވަހު އޭނާ ހައްޔަރުކޮށް އޭނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ވަނީ 15 ދުވަހަށް ބަންދު ކުރުމަށް އަމުރު ކޮށްފައިވާ ކަމަށް ފުލުހުން ވަނީ ވިދާޅުވެފައެވެ.
