ރިޔާސީ އިންތިޚާބުތަކުގައި ދެވަނަ ބުރަކަށް ދިޔުމުގެ ބަދަލުގައި އެންމެ ބުރަކުން ވެރިޔަކު ކަނޑައެޅޭހެން ވޯޓުލާ ނިޒާމު ބަދަލު ކުރުމަށް ބޭނުންފުޅުވާތީ އެ ކަމަށްޓަކައި ރައްޔިތުންގެ ފެންނަ ނުފެންނަ ވޯޓަކަށް ރައްޔިތުންގެ މަޖިލިސް މެދުވެރިކޮށް އަހާނެކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެ އެވެ.
މިރޭ ބޭއްވި ޖުމްހޫރި ދުވަހުގެ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ރިޔާސީ އިންތިހާބުގައި ދެވަނަ ބުރަކޮށް ނުގޮސް އެއްބުރުން ކާމިޔާބު ކުރެވޭނެ ގޮތެއް އޮތުމުން ހަރަދުވެސް ކުޑަކުރެވޭނެ ކަމަށެވެ. ރައީސް ވިދާޅުވީ ރިޔާސީ އިންތިހާބުގެ އެންމެ ބުރެއް ބާއްވަން ޖެހޭނެ ގޮތްތައް ހޯދުމަށް އެޓާނީ ޖެނެރަލާ އޮފީހާ ހަވާލުކޮށްފައިވާ ކަމަށެވެ.
"އަޅުގަނޑު ގަބޫލުކުރާ ގޮތް، ދެވަނަ ބުރަކަށް ނުގޮސް، ފުރަތަމަ ބުރުގައި ޕްރިފަރެންޝަލް ވޯޓިން އިން ދެވަނަ ބުރަކަށް ދާ ހާލެއްގައި ވެރިޔަކަށް ހޮވާނެ މީހާ ވެސް އެނގޭ ގޮތަށް ވޯޓުލެވޭ ގޮތަށް. މާނައަކީ އެއްބުރުން ނިމޭނެއޭ. އެއްބުރުން އެއްވަނަ، ދެވަނަ ސާފުވާ ގޮތަށް،،،،،،' " ރައީސް ވިދާޅުވި އެވެ.
ރައީސް ވިދާޅުވީ އަވައްޓެރި ބައެއް ގައުމުތަކުގައިވެސް ރިޔާސީ އިންތިހާބުގެ ދެވަނަ ބުރެއް ނުބާއްވާ ކަމަށެވެ. އަދި ރިޔާސީ އިންތިހާބުގެ އެންމެ ބުރެއް ބާއްވާ ގޮތަށް ހެދުމަށް ރައްޔިތުންގެ ފެންނަ ނުފެންނަ ވޯޓެއް ނަގަން ބޭނުންފުޅުވާ ކަމަށާއި އަންނަ ރިޔާސީ އިންތިހާބުން ފެށިގެން ދެ ބުރު ނޯންނަ ގޮތަށް އެކަން ބަދަލުކުރައްވާނެ ކަމަށެވެ.
