ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު، ނިޝާން އިއްޒުއްދީނުގެ އިއްޒަތުގެ ވެރިޔާ އަދި ރާއްޖޭގެ އިސްލާމީ ޔުނިވާސިޓީގެ ޗާންސެލަރު ޑރ. މުހައްމަދު ޒާހިރު ހުސެއިނަށް މިރޭ އަރުވައިފި އެވެ.

ޖުމްހޫރީ ދުވަސް ފާހަގަ ކުރުމަށް ދަރުބާރުގޭގައި މިހާރު ކުރިއަށްދާ ޖަލްސާގައި ޒަހީރަށް އެ ޝަރަފު އަރުވައިދެއްވީ ރައީސް ޑރ. މުހައްމަދު މުއިއްޒެވެ.

އެޑިއުކޭޝަން މިނިސްޓަރުކަން ކުރެއްވެވި ޒާހިރަކީ ޒަމާނީ ތައުލީމު ދިވެހިންގެ މެދުގައި ފެތުރުމުގައި އިސްދައުރެއް އަދާކުރެއްވި، ރާއްޖޭގެ ތައުލީމީ ތަރައްގީއަށާއި ތައުލީމީ ދާއިރާ ފުޅާކުރެއްވުމަށް އަދި ތައުލީމީ ރޮގުން ރައްޔިތުން ހޭލުންތެރި ކުރުމަށް ގިނަގުނަ މަސައްކަތްތަކެއް ކުރައްވަމުން ގެންދަވާ ބޭފުޅެކެވެ. ޒާހިރު ވަނީ މޯލްޑިވްސް ނޭޝަނަލް ޔުނިވާސިޓީގެ ޗާންސެލަރުކަން ވެސް ކުރައްވައިފައެވެ. އަދި ތައުލީމީ ދާއިރާގެ އިތުރުން ޒުވާނުންނާއި ކުޅިވަރާ ބެހޭ މިނިސްޓަރުކަން ކުރައްވައި އެ ދެ ދާއިރާގެ ކުރިއެރުމަށް ޒާހިރު ވަނީ ބޮޑެތި ހިދުމަތްތަކެއް ކުރައްވައިފައެވެ.

ޒާހިރު ވަނީ ވަރަށް ޅަފަތުގައި އޮތް ރާއްޖޭގެ ތައުލީމީ ނިޒާމަށް އޭނާގެ އެޑިއުކޭޝަން މިނިސްޓަރުކަމުގައި ވަރަށް ބޮޑެތި ކުރިއެރުންތަކެއް ގެނެސް ދެއްވައިފައެވެ. އޭރުގެ ރައީސް މައުމޫން އަބްދުލްގައްޔޫމް ފެއްޓެވި އަސާސީ ތައުލީމްގެ ޕްރޮގްރާމް ހިންގުމުގައި އެންމެ އިސްކޮށް ހުންނެވި ބޭފުޅަކީ ވެސް ޒާހިރެވެ. އަދި އެކި ރަށްރަށަށް ކޮމިއުނިޓީ ސްކޫލްތައް ތައާރަފުކޮށް، އަތޮޅު ތައުލީމީ މަރުކަޒުތަކުގެ ބިންގާ އެޅުއްވި ބޭފުޅަކީ ޒާހިރެވެ.

މިސްރުގެ އަލް އަޒްހަރު ޔުނިވާސިޓީން ތައުލީމު ހާސިލުކުރެއްވުމަށްފަހު ރާއްޖެ ވަޑައިގެން ނޮވެމްބަރު 26، 1970 ގައި އަމީނިއްޔާ ސްކޫލުގެ އިސްލާމް ޓީޗަރެއްގެ މަގާމު ޒާހިރު ހުސައިން ވަނީ އަދާކުރައްވާފައެވެ. އޮގަސްޓް 20، 1972 ވަނަ އަހަރު ސަރުކާރުން ޒާހިރު ހުސައިން އެޑިއުކޭޝަން މިނިސްޓްރީގެ ވަކީލުކަމަށް އައްޔަން ކުރެއްވިއެވެ. އަދި އޮކްޓޯބަރު 23، 1976 ގައި ޑިޕާޓްމަންޓު އޮފް އެޑިއުކޭޝަންގެ ނައިބުގެ މަޤާމަށް އައްޔަން ކުރެވުނެވެ.

ޔުނެސްކޯ އާއި ޔުނިސެފްް އަދި ޔޫއެންޑީޕީ ގުޅިގެން ރާއްޖޭގައި ކޮމިއުނިޓީ ތައުލީމު ތައާރަފްކުރުމުގެ މަޝްރޫއު ނާސިރުގެ ދައުރުގައި ފެށިގެން ދިޔައިރު އެންމެ އިސްކޮށް އެ މަސައްކަތުގައި އުޅުއްވީ ޒާހިރެވެ. މި މަޝްރޫއުގެ ދަށުން ރާއްޖޭގައި ސްކޫލުތައް އެޅި ކިޔަވައިދޭ ޓެކްސްޓް ފޮތްތައްވެސް ތައާރަފްވެގެން ދިޔައެވެ.

ޖުލައި 23، 1979 ވަނަ އަހަރު ޒާހިރު ހުސައިން އެޑިއުކޭޝަން މިނިސްޓަރުކަމާ ހަވާލުވެވަޑައިގެން އޭނާ އެންމެ ބޮޮޑު އިިސްކަމެއް ދެއްވީ ރާއްޖޭގެ އެކިކަންކޮޅުތަކުގައި ކޮމިއުނިޓީ ސްކޫލް އިމާރާތްތައް އެޅުއްވުމަށެވެ. އަތޮޅުތަކުގެ އިތުރުން މާލޭގައި މަތީ ތައުލީމު އުގަންނައިދޭނެ ސްކޫލެއް "ސައިންސް އެޑިއުކޭޝަން ސެންޓަރު"ގެ ނަމުގައި 1979 ވަނަ އަހަރު ޒާހިރު ހުސައިންގެ މޭސްތިރިކަމުގައި ވަނީ ހުޅުއްވައިފައެވެ.

ޒާހިރު ވަނީ ތައުލީމީ މުގައްރިރަށް އެކިފަހަރުމަތިން އިސްލާހީ ހެޔޮ ބަދަލުތަކެއް ގެނެސް ދެއްވައިފައެވެ. މީގެއިތުރުން ރާއްޖޭގައި އަރަބިތައުލީމު އުގަންނަވައިދެއްވުމަށާއި އަރަބި ތައުލީމު ފުޅާކުރެއްވުމަށް ވެސް އޭނާ ވަނީ ގިނަގުނަ މަސައްކަތްތަކެއް ކުރައްވައިފައެވެ. އެގޮތުން "މައުހަދުލް ދިރާސާތުލް އިސްލާމިއްޔާ"ގެ ނަމުގައި ނޮވެމްބަރު 9، 1980 ވަނަ އަހަރު ހުުޅުވިގެންދިޔައެވެ. އަދި ސާނަވީ ތައުލީމު އުގަންނައިދިނުމަށްޓަކައި "އަލްމަދަރުސަތުލް އަރަބިއްޔަތުން އިސްލާމިއްޔާ" އުފެދިގެންދިޔައެވެ.

ތައުލީމީ ވަޒީރުކަން 10 އަހަރާއި 9 މަހުގެ މުއްދަތަކަށް އަދާކުރައްވާފައިވާއިރު އޭނާ ވަނީ ރާއްޖޭގެ ތައުލީމީ ދާއިރާއަށް އިންގިލާބީ ބަދަލެއް ގެނެސްދެއްވައިފައެވެ. އޭގެ ފަހުން:

• ރައީސް އޮފީހުގެ މިނިސްޓަރެއްގެ މަގާމު
• މިނިސްޓްރީ އޮފް ޔޫތު އެންޑް ސްޕޯޓްސްގެ މަގާމު
• މިނިސްޓްރީ އޮފް ޔޫތު ޑިވެލޮޕްމަންޓު އެންޑް ސްޕޯޓްސްގެ މަގާމު
• ޒާހިރު ވަނީ އަދާކުރައްވައިފައެވެ.

ޒާހިރަކީ ރާއްޖޭގެ ކުޅިވަރު ދާއިރާގައިވެސް ނުހަނު ގިނަ ގުނަ މަސައްކަތްތަކެއް ކުރެއްވި އަދި އެ ދާއިރާ ކުރިއެރުވުމުގައި މޭސްތިރިއަކަށް ހުންނެވި ބޭފުޅެކެވެ. އެގޮތުން ރާއްޖޭގައި ކުޅިވަރު ޒޯންތަކަށް ބައްސަވާލައްވައި ޒޯން ސްޓޭޑިއަމްތައް ބިނާކުރެއްވީ ޒާހިރުގެ މޭސްތިރިކަމުގައެވެ.

• ކުޅިވަރަށް އެމަނިކުފާނު ކުރެއްވި ހިދުމަތްތަކުގެ އަގު ވަޒަންކުރެއްވުމުގެ ގޮތުން މާރޗް 17، 2022 ގައި އޭނާއަށް ވަނީ "ލައިފްޓައިމް އެޗީވްމަންޓު" އެވޯޑެއް ލިބިވަޑައިގެންފައެވެ.
• 1989 ވަނަ އަހަރު ނޫސްވެރިކަމުގެ ރޮގުން އާންމު ޚިދުމަތުގެ ޝަރަފުވެސް ޒާހިރަށް ލިބިވަޑައިގެންނެވި
• 2004 ވަނަ އަހަރު ނޫސްވެރިކަމުގެ "އަލިމަސް ގަލަން"ވެސް ލިބިވަޑައިގެންނެވި.
• 1990 ވަނަ އަހަރު މިނިވަން 25 ގެ އާންމު ޚިދުމަތުގެ އިނާމު ޒާހިރު ހުސައިންއަށް ލިބިވަޑައިގެންނެވި.
• 2008 ނޮވެމްބަރު 10 ގައި ނިޝާން އިއްޒުއްދީންގެ އިއްޒަތުގެ ލަޤާބުވެސް ލިބިވަޑައިގެންނެވި.

ރައްޔިތުންގެ މަޖިލީހުގައި ރައީސުލްޖުމްހޫރިއްޔާގެ މެންބަރެއްގެ ހައިސިއްޔަތުން ގައުމަށް ހިދުމަތްކުރައްވާފައިވާ ޒާހިރު ވަނީ ކީރިތި ގުރުއާން ދިވެހިި ބަހަށް ތަރުޖަމާކުރާ ކޮމިޓީގައި ދިގުމުއްދަތަކަށް ހިދުމަތް ކުރައްވައިފައެވެ. ހުކުރު ހުތުބާ ލިޔުއްވުމުގެ އިތުރުން މާލޭގެ މިސްކިތްތަކުގައި އިމާމުވެ ހުކުރު ނަމާދާއި އީދު ނަމާދުވެސް ކުރެއްވިއެވެ.

ޒާހިރުގެ ދެ އަންހެން ދަރިކަނބަލުންނާއި ފިރިހެން ދަރިކަލަކު ދުނިޔޭގައި އެބަ ހުންނެވިއެވެ.