ވޭޕް ރާއްޖެއަށް އެތެރެކުރުމާއި އޭގެ ވިޔަފާރިކުރުން ސަރުކާރުން މަނާކުރަން ނިންމުމާ ގުޅިގެން އެ ވިޔަފާރިއާ ގުޅުންހުރި 300 ވަރަކަށް އާއިލާ މާލީ ގޮތުން ބިކަވެފައިވާ ކަމަށާއި އެ އާއިލާތަކަށް ސަރުކާރުން ބަދަލުދޭން ޖެހޭނެ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު އަބްދުއްރަހްމާން މިއަދު ވިދާޅުވެއްޖެ އެވެ.
މަޖިލީހުގެ އިޖުތިމާއީ ކޮމިޓީގައި މިއަދު ވާހަކަދައްކަވަމުން އަބްދުއްރަހުމާން ވިދާޅުވީ ވޭޕުގެ ވިޔަފާރިކުރާ ފަރާތްތަކުން އެކަމަށް ބޮޑެތި އިންވެސްޓުމެންޓުތަކެއް ކޮށްފައި ކަމަށެވެ. މާލެއާ ހުޅުމާލޭގައި ވެސް ވޭޕްގެ ވިޔަފާރިކުރާ 16 ވަރަކަށް ތަން ހުރިއިރު، އެ ތަންތަނުގައި 300އެއްހައި މުވައްޒަފުން އުޅޭކަން އޭނާ ފާހަގަ ކުރެއްވި އެވެ.
"އަޅުގަނޑުގެ ހަމަ އޮތް ކޮންސާނަކީ މި ކަމާ ގުޅުންހުރި ފަރާތްތަކަށް ގާނޫނާ ގަވާއިދުގެ ތެރެއިން ވިޔަފާރި ކުރަމުން އައި ބައެއް، ބޮޑެތި އަދަދުތަކުން އިންވެސްޓް ކޮށްގެން. މި ދައްކަނީ ގާތްގަނޑަކަށް 300 ވަރަކަށް އާއިލާގެ ދިރިއުޅުމުގެ ވާހަކަ. އެ ބޭފުޅުންނަށް ވާނެ އެއްޗެއް އަޅުގަނޑު ހަމަ އެދެން ސަރުކާރުގެ ފަރާތުން ވެސް ފަހުން ހަމަ ހައްލެއް ހޯދައިދިނުމަށް،" އަބްދުއްރަހްމާން ވިދާޅުވި އެވެ.
ކޮމިޓީގައި ވާހަކަދައްކަވަމުން ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް ވިދާޅުވީ ދުންފަތާ ގުޅޭ ބިލު ކޮމިޓީން ނިންމަން ހިފާފައިވާއިރު، އެ ކަމުގެ ސްޓޭކްހޯލްޑަރުންނާ މަޝްވަރާ ކުރުމުގެ އިތުރުން، އެހެނިހެން ގޮތްގޮތުން އައިސްފައިހުރި ކޮމެންޓުތައް ވެސް ހުރިތާގައި ހުރީ ކަމަށެވެ. އޭނާ ވިދާޅުވީ ވޭޕް މަނާކުރަން ޖެހޭ ކަމަށާއި ނަމަވެސް ކުއްލިއަކަށް އެކަން ކުރަން ނިންމުމުން އެކަމުގެ ނޭދެވޭ އަސަރު އެކި ގޮތްގޮތުން ކުރާނެ ކަމަށެވެ.
މުހައްމަދު އިބްރާހީމްގެ ވާހަކަތަކަށް ތާއީދު ކުރައްވާ ދާންދޫ ދާއިރާގެ ޕީއެންސީ މެންބަރު މުހައްމަދު ފަޒީލް ވެސް ވިދާޅުވީ ކުއްލިއަކަށް ވޭޕް މަނާކޮށްފިނަމަ ރައްޔިތުންގެ ތެރެއިން ކޮންމެވެސް ބަޔަކަށް ގެއްލުންތަކެއް ލިބޭނެއެވެ. ނަމަވެސް ބިލް މިހާރު އޮތް ގޮތަށް ފާސްކުރުމަށް ފަހު، ފަހުން އިސްލާހުތައް ހުށަހެޅުން ރަނގަޅުވާނެ ކަމަށް މުހައްމަދު ފަޒީލް ވިދާޅުވި އެވެ.
ކޮމިޓީގެ އަގުލަބިއްޔަތުން އެ ގޮތަށް ފާސްކުރި ނަމަވެސް، ތިން ބޭފުޅަކު ވަކި ގޮތަކަށް ވޯޓެއް ނުދެއްވައެވެ. އެއީ އައްޑޫ މީދޫ ދާއިރާގެ މެންބަރު އަބްދުއްރަހްމާނާއި، ގަލޮޅު އުތުރު ދާއިރާގެ މެންބަރުގެ މުހައްމަދު އިބްރާހީމްގެ އިތުރުން، މާފަންނު ހުޅަނގު ދާއިރާގެ ޕީއެންސީ މެންބަރު މުސްތަފާ އިބްރާހީމެވެ.
ސަރުކާރުން ނިންމައިފައިވަނީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން މިމަހުގެ 15އިން ފެށިގެން މަނާކުރުމަށެވެ.
