ޕްރޮސެސިން ފެސިލިޓީތަކާއި ކޯލްޑް ސްޓޯރޭޖުތައް ގާއިމްކޮށް ނިމުމުން މަސްވެރިކަމުގެ ދާއިރާއިން ލިބޭ އާމްދަނީ ދެތިން ގުނައަށް އިތުރުވެގެންދާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޝިޔާމް ވިދާޅުވީ ރާއްޖެއިން އެކްސްޕޯޓްކުރާ މަސް އެކި ފަރާތްތަކުން ބޮޑު އަގުގައި ވިއްކަމުންދާ ކަމަށެވެ. އެއީ ރޯ މެޓީރިއަލްގެ ގޮތުގައި މަސް ބޭރުކުރަން ރާއްޖެއަށް މަޖުބޫރުވެފައި އޮތަތީ ކަމަށް އޭނާ ވިދާޅުވިއެވެ. ރޯ މެޓީރިއަލްގެ ގޮތުގައި ރާއްޖެއިން މަސް ބޭރުކުރަންޖެހޭތީ، އެ ކަމުގައި ލިބެންޖެހޭ "ރަނގަޅު އަގެއް" ނުލިބޭ ކަމަށް ޝިޔާމް ވިދާޅުވި އެވެ.
"އަޅުގަނޑު ނުދަންނަވާނަން ހަމަ އަގެކޭ. ރަނގަޅު އަގެއް ނުލިބޭކަން އަޅުގަނޑުމެންނަށް މި އެނގެނީ. އެ މަސް ދިވެހިރާއްޖޭގެ އަގު އެއްކޮށްގެން އަޅުގަނޑުމެންނަށް ބޭރުކުރެވޭ ކަމަށްވަންޏާ އަޅުގަނޑުމެންނަށް، މަސް އެކްސްޕޯޓުކޮށްގެން ދިވެހިރާއްޖެއަށް މި ވައްދާ ބޭރު ފައިސާ އެތައް ގުނައެއް އިތުރު ކުރެވޭނެ" ޝިޔާމް ވިދާޅުވިއެވެ.
ޝިޔާމް ވިދާޅުވި ގޮތުގައި ކޯލްޑް ސްޓޯރޭޖާއި ޕްރޮސެސިން ފެސިލިޓީތައް ގާއިމްކޮށް، މަސްވެރިކަމުގެ ސިނާއަތުގައި ސަރުކާރުން ހާސިލްކުރަން ބޭނުންވާ ޓާގެޓު ހާސިލް ކުރެވުމާއެކު، އެ ކަމުން ލިބޭ އާމްދަނީ ދެތިން ގުނައަށް އިތުރުވާނެއެވެ.
އެ ގޮތުން ސަރުކާރުން ވަނީ ރާއްޖޭގެ އެކި ކަންކޮޅުތަކުގައި ގާއިމް ކުރެވިފައިވާ ކޯލްޑް ސްޓޯރޭޖުތަކާއި ޕްރޮސެސިން ފެސިލިޓީތަކުގެ ކެޕޭސިޓީ އިތުރު ކުރުމުގެ މަސައްކަތް ފަށައިފައެވެ. އެ ގޮތުން:
- ޅ. ފެލިވަރުގެ ޕްރޮސެސިން ފެސިލިޓީއަށް 100 ޓަނު އިތުރުކުރާނެ
- ފ. ނިލަންދޫގެ ޕްރޮސެސިން ފެސިލިޓީއަށް 100 ޓަނު އިތުރުކުރާނެ
- ގދ. ފިޔޯރީގެ ޕްރޮސެސިން ފެސިލިޓީއަށް 100 ޓަނު އިތުރުކުރާނެ
