ވިޔަފާރީގެ ބޭނުމަށް ރާއްޖެއަށް ބުޅާ އެތެރެކުރުން ވަގުތީ ގޮތުން މަނާކުރަން ނިންމާފައިވާ ކަމަށް އެނިމަލް ވެލްފެއާ މިނިސްޓަރު ޑރ. އައިޝަތު ރަމީލާ ވިދާޅުވެއްޖެ އެވެ.
ޕީއެސްއެމްގެ ޕްރޮގްރާމެއްގައި ވާހަކަދައްކަވަމުން ރަމީލާ ވިދާޅުވީ ސަރުކާރުން މިހާރު ޑްރާފްޓްކޮށްފައިވާ ޖަނަވާރުންގެ ރައްކާތެރިކަމާ ބެހޭ ބިލުގައިވާ ގޮތުން ޕެޓްގެ ގޮތުގައި ރާއްޖެއަށް އެތެރެކުރާ ދިރޭތަކެތި ރާއްޖެ އެތެރެކުރުން ކޮންޓްރޯލް ކުރެވޭނެ ގޮތްތަކެއް ހިމަނައިފައިވާ ކަމަށެވެ. ރަމީލާ ވިދާޅުވީ މަގުތަކުގައި އުޅޭ ހުރިހާ ބުޅާތަކެއް ބުޅާ ފެސިލިޓީއަށް ބަދަލު ކުރުމުން، ވިޔަފާރީގެ އުސޫލުން ރާއްޖެއަށް ބުޅާ އެތެރެކުރުން ވަކި މުއްދަތަކަށް މަނާކުރާނެ ކަމަށެވެ.
"އެ ބިލްގައި ވާނީ ޕެޓްގެ ގޮތުގައި ރާއްޖެއަށް އެތެރެކުރެވޭ އެއްޗެއްސަށް ކޮންޓްރޯލް މެކޭނިޒަމެއް ލާނެ ގޮތް ވެސް އެބަ އޮވޭ. އެހެންވީމަ މިހާރުގެ ޕްލޭންގައި އެބަ އޮތް ހުރިހާ ބުޅާތައް ޕެޓްކެއާ ފެސިލިޓީއަށް ނެގީމަ، ކޮންމެވެސް މުއްދަތަކަށް ވިޔަފާރީގެ އުސޫލުން ވިއްކުމަށްޓަކައި ބުޅާ އެތެރެކުރުން ހޯލްޑްކުރާނީއޭ،" ރަމީލާ ވިދާޅުވި އެވެ.
"އޭރުން ބުނާ ޕެޓްގެ ގޮތުގައި ނަގާނީ ފެސިލިޓީން. އެކަމަކު އަމިއްލަ ފަރާތަކުން ޕެޓްގެ ގޮތުގައި ގެނައުން މައްސަލައެއް ނޫން. އެކަމަކު ވިއްކުމަށް ބުޅާ އެތެރެކުރުން ކޮންމެވެސް ވަރަކަށް ހޯލްޑް ކުރާނަން."
ސަރުކާރުން ހުޅުމާޅޭގައި ހެދި "އޮޅު ހިޔާ" ގެ މަސައްކަތް ރަނގަޅަށް ފެށުމުން އާންމުންނަށް އެތަނުން ބުޅާ އެޑޮޕްޓްކުރެވެން ހުންނާނެ ކަމަށް ރަމީލާ ވިދާޅުވި އެވެ. އަދި ބުޅާ އެތެރެ ކުރުމުގެ ފުރުސަތު އޮއްވާ އެޑޮޕްޝަނަށް ހުޅުވާލުމުން ބުޅާ ރާއްޖެ އެތެރެކުރާ މިންވަރު އިތުރުވާނެ ކަމަށާއި އޭގެ ސަބަބުން ގެންނަން ބޭނުންވާ ނަތީޖާ ނުނެރެވޭނެ ކަމަށް އޭނާ ވިދާޅުވި އެވެ.
