މި ސަރުކާރަށް މިވީ އެގާރަ މަސް ދުވަހުގެ ތެރޭގައި ދައުލަތަށް ލިބިފައިވާނީ އެންމެ 18 ބިލިއަން ރުފިޔާ ކަމަށް ގަބޫލު ނުކުރެއްވޭ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފްގެ ބައްދަލުވުމުގައި ވާހަކަ ދައްކަވަމުން ޔާމީން ވިދާޅުވީ ދައުލަތަށް ލިބޭނެކަމަށް 33 ބިލިއަން ރުފިޔާއަށް ސަރުކާރުން އިންތިޒާރު ކުރިކަމަށެވެ. ޔާމީން ވިދާޅުވީ މިދިޔަ 11 މަސް ތެރޭގައި ދައުލަތަށް 18 ބިލިޔަން ރުފިޔާއަށްވުރެ ގިނައިން ވަދެފައި އޮންނާނެ ކަމަށެވެ.
"އެއަށްވުރެ ގިނައިން ވަދެފަ އޮންނާނެ. ބާކީ ބަޔަށްވީ ކިހިނެއްހޭ ފުރަތަމަ ސުވާލަކީ. އެ ހާމަނުކުރާން އެ އުޅެނީ ކީއްވެހޭ" ޔާމީން ވިދާޅުވިއެވެ.
ސަރުކާރުން ހުށަހެޅި ސަޕްލިމެންޓްރީ ބަޖެޓާބެހޭ ގޮތުން ވާހަކަ ދައްކަވަމުން ޔާމީން ވިދާޅުވީ، އެ ބަޖެޓް މަޖިލީހުން ފާސްކުރަން އުޅެނީ ގާނޫނާ ޚިލާފަށް ކަމަށެވެ. ޔާމީން ވިދާޅުވީ ސަޕްލިމެންޓްރީ ބަޖެޓް ފާސްކުރާއިރު، ދައުލަތުން އެއް އަހަރު ދުވަހު ޚަރަދުކުރި ވަރު ބަލަން ޕީއެންސީގެ މެންބަރުން ބޭނުންނުވާ ކަމަށެވެ. ނުދައްކާ ހިސާބު ތަކެއްގެ މައްޗަށް ބިނާކޮށް ސަޕްލިމެންޓްރީ ބަޖެޓެއް ފާސް ނުކުރެވޭނެ ކަމަށް ވިދާޅުވިއެވެ.
