ކުރީ ސަރުކާރުން ކުރިއަށްގެންދިޔަ ބިންވެރިޔާ ސްކީމުގެ ދަށުން ހުޅުމާލޭގެ ފޭސް ދޭކުން ގޯތި ލިބުނު މީހުންނަށް، ގޯތި ހަވާލުކޮށް ނިންމާލާފައިވާ ކަމަށް ހައުސިން މިނިސްޓްރީން ބުނެފި އެވެ.
ހައުސިން މިނިސްޓްރީން މިއަދު އެކްސްގައިކުރި ޕޯސްޓެއްގައި ބުނީ އެ ގޯތިތައް ހަވާލުކޮށް ނިންމާފައިވަނީ މިއަދު ކަމަށެވެ.
ހައުސިން މިނިސްޓަރު ޑރ. އަލީ ހައިދަރު މީގެކުރިން ވަނީ މިމަހުގެ ނިޔަލަށް އެ ހުރިހާ ގޯއްޗެއް ހަވާލުކޮށް ނިންމާލެވޭނެ ކަމަށް ވިދާޅުވެފައެވެ. ނަމަވެސް ހުޅުމާލެ ތިންވަނަ ފިޔަވައްސާއި ގުޅީ ފަޅު އަދި ގިރާވަރު ފަޅުން ގޯތި ލިބުނު މީހުންނަށް ގޯތިތައް ހަވާލު ކުރަން ފަށާނީ އެތަންތަން ހިއްކައި ނިމުމުން ކަމަށެވެ.
ބިންވެރިޔާ ސްކީމުގެ ދަށުން މިދިޔަ ސަރުކާރުގައި މާލެ ރައްޔިތުންނަށް 9،003 ގޯތި ދޫކުރި އެވެ. ބިންވެރިޔާ ސްކީމުން ގޯތި ދޫކުރީ ހުޅުމާލެ އާއި ގުޅީފަޅާއި ގިރާވަރު ފަޅުންނެވެ. އެއީ ހުޅުމާލެއިން 1351 ގޯއްޗާއި ގުޅީފަޅުން 2219 ގޯއްޗާއި ގިރާވަރުފަޅުން 5433 ގޯއްޗެވެ.
