ޑޮމެއިން ނަންބަރު ދޫކުރަން އަންނަ މަހު އަލުން ފަށާނެ ކަމަށް ޓްރާންސްޕޯޓް މިނިސްޓްރީން ބުނެފިއެވެ.
މިނިސްޓްރީން ބުނީ އަލުން ޑޮމެއިން ދޫކުރަން ފަށަނީ ކުރިން އޮތް ގަވައިދު އިސްލާޙު ކޮށްފައި ކަމަށެވެ. ނީލަމުގެ އުސޫލުން ވިއްކަމުން ދިޔަ ޑޮމެއިން ނަމްބަރުތައް ވިއްކުން މިނިސްޓްރީން ހުއްޓާލީ ކުރީގެ ސަރުކާރުގައި އޮގަސްޓް، 2023 ގައެވެ.
ޓްރާންސްޕޯޓުން ބުނީ އަލުން ޑޮމެއިން ހިދުމަތް ދިނުމުގެ މަސައްކަތް ފަށާނީ ރެކޯޑުތައް ބަލަހައްޓައި އަދި މޮނިޓާ ކުރާނެ ހަރުދަނާ ނިޒާމެއް ގާއިމު ކުރުމަށްފަހު ކަމަށެވެ. އަދި ޑޮމެއިންގެ ހިދުމަތް އަލުން ދިނުމަށް ކުރިމަތިވާ އެންމެ ބޮޑު ގޮންޖެހުމަކީ، ވޭތުވެދިޔަ ތަނުގައި ޑޮމެއިންގެ ރެކޯޑްތައް ހަރުދަނާ ގޮތެއްގައި ބަލަހައްޓާފައި ނެތުން ކަމަށްވެސް އެ މިނިސްޓްރީން ބުނެއެވެ.
މިނިސްޓްރީން ބުނީ އަންނަ މަހު ޑޮމެއިން ވިއްކަން އަލުން ފަށާއި ދިމާވެފައިވާ މައްސަލަތައް ޙައްލު ކުރަން މަސައްކަތް ކުރާނެ ކަމަށެވެ.
މިނިސްޓްރީން ބުނީ، ޑޮމެއިން ހިދުމަތް ފޯރުކޮށްދިނުމަށް ދޫކުރެވޭ އެންމެހައި ލިޔެކިޔުންތަކަކީ ސެކިއުރިޓީ ފީޗާސްތައް އެކުލެވޭ ލިޔުންތަކަކަށް ބަދަލު ކުރާނެ ކަމަށެވެ.
