18 އަހަރު ފުރޭ ޒުވާނުންގެ ހައްގުތައް މި ސަރުކާރުން ނިގުޅައިގަނެ، ހަނިކުރަމުން ދާތީ އެކަމާދެކޮޅަށް ހުރިހާ ޒުވާނުން އަޑު އުފުލަންޖެހޭ ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މިއަދު ފާހަގަ ކުރަމުންދާ ޒުވާނުންގެ ދުވަހާއި ގުޅިގެން، ދުވަހުގެ ތަހުނިޔާ ޒުވާނުންނަށް ވިދާޅުވެ އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ޒުވާނުންގެ ދުވަހު ހުރިހާ ދިވެހި ޒުވާނުންވެސް ޢަޒުމު އާކުރަންވީ، ބުރަމަސަތްކަތާއި ޤުރުބާނީއިން ހޯދި ޙައްޤުތައް ހިފެހެއްޓުމަށް ކަމަށެވެ.
"ޒުވާނުންގެ ދުވަސް މިއަދު ފާހަގަ ކުރަމުންދާއިރު, 18 އަހަރު ފުރޭ ޒުވާނުންގެ ޙައްޤުތައް މި ސަރުކާރުން ނިގުޅައިގަނެ ހަނިކުރަމުން ގެންދާތީ އެކަމާ ދެކޮޅަށް އެންމެހާ ޒުވާނުންވެސް މިއަދު އަޑުފުލަންޖެހޭ. ޒުވާނުންގެ ދުވަހު އެންމެހާ ދިވެހި ޒުވާނުންވެސް ޢަޒުމު އާކުރަންވީ، ބުރަމަސަތްކަތާއި ޤުރުބާނީއިން ހޯދި ޙައްޤުތައް ހިފެހެއްޓުމަށް" ޝާހިދު ވިދާޅުވިއެވެ.
ޝާހިދުގެ ޕޯސްޓުގައި އިތުރަށް ވިދާޅުވީ، 2008 ވަނަ އަހަރު ޢަމަލު ކުރަންފެށި ޤާނޫނު އަސާސީ އެކުލަވާލި ރައްޔިތުންގެ ޚާއްސަ މަޖިލީހުގައި އެމްޑީޕީ އިން އިސްނަގައި ވަކާލާތުކޮށް، 18 އަހަރުން މަތީގެ ކޮންމެ މީހަކަށް އިންތިޚާބު ތަކުގައި ވޯޓު ދިނުމާއި އިންތިޚާބު ތަކުގައި ވާދަ ކުރުމުގެ ޙައްޤު ލިބިފައިވާ ކަމަށެވެ. އަދި ވިދާޅުވީ، އެމްޑީޕީއަކީ އެމްޑީޕީއަކީ އަބަދުވެސް ޒުވާނުންގެ ޙައްޤުތައް ކަށަވަރު ކުރުމުގައި ދެގޮތެއް ނުވެ ދެމި އޮންނަ ޕާޓީއެއް ކަމަށެވެ.
