ޓެކްސްތައް ބޮޑު ކުރަން ޖެހިގެން އުޅެނީ މި ސަރުކާރުން ގެންގުޅުނު ފައިނޭންސިން ސްޓްރެޓެޖީ ފެއިލްވުމުން ކަމުގައި ކުރީގެ ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
އެމްޑީޕީން މިއަދު ބޭއްވި ނިއުސްކޮންފަރެންސްގައި ވާހަކަ ދައްކަވަމުން އަމީރު ވިދާޅުވީ 2024 ގެ ބަޖެޓަށް 400 މިލިއަން ޑޮލަރު ހޯދާނެ ކަމަށް ވިދާޅުވި ކަމަށާއި، 2025 ގެ ބަޖެޓު ފައިނޭންސް ކުރާނެ ގޮތެއްވެސް މި ސަރުކާރަށް އަދި ނޭނގޭ ކަމަށެވެ.
އަމީރު ވިދާޅުވީ، ސަރުކާރުގައި އިޚްލާސްތެރި ނިޔަތެއް އޮތްނަމަ، އެންމެ ފުރަތަމަ ކުރަންޖެހޭ ކަމަކީ ސަރުކާރުގެ ބޭކާރު ޚަރަދުތައް ކުޑަކުރުން ކަމަށާއި، ސަރުކާރުގެ ޚަރަދުތައް ކުޑަނުކޮށް ޓެކްސް ބޮޑު ކުރިޔަސް ރައްޔިތުންނަށް ވާނެފައިދާއެއް ނޯންނާނެ ކަމަށެވެ.
އަމީރު ވިދާޅުވީ ލިބިފައިވާ މައުލޫމާތަށް ބަލާއިރު ސިޔާސީ މަގާމުތަކުގެ މުސާރައިގެ ގޮތުގައި ބިލިޔަނާ ގާތަށް އަހަރަކު ޚަރަދު ކުރެއެވެ. ނަމަވެސް 228 ސިޔާސީ ވަޒީފާ މަދުކުރާ ވާހަކަ ދައްކާފައި ފަސްވަރަކަށް މިލިއަން ރުފިޔާ ސަލާމަތް ކުރެވޭ ވާހަކަ ސަރުކާރުން ދައްކާ ކަމަށް ވިދާޅުވެ އަމީރު ވަނީ ވަރަށް ބޮޑަށް ފާޑު ވިދާޅުވެފައެވެ.
