ރާއްޖެއަށް ވޭޕް އެތެރެކުރުމާއި ބުއިން މަނާ ކުރަން ރައީސް ޑރ. މުޙަންމަދު މުއިއްޒު އިއްޔެ ނިންމެވި ނިންމެވުމަށް ވެރިކަންކުރާ މައި ޕާޓީ، ޕީއެންސީން ތައުރީފު ކޮށްފިއެވެ.
އެކަމާއި ގުޅިގެން އެ ޕާޓީން ނެރުނު ބަޔާނެއްގައި ބުނީ ވޭޕް މަނާކުރަން ރައީސް ނިންމެވި ނިންމެވުމަކީ ޒުވާނުންނާއި ކުޑަކުދިންގެ ސިއްޙަތަށް، ޚާއްސަކޮށް މަސްތުވާތަކެތިން ސަލާމަތް ކުރުމަށް ރައީސް އެޅުއްވި ހަރުދަނާ ނިންމެވުމެއް ކަމަށެވެ. އަދި އެފަދަ ނިންމެވުމެއް ރައީސް ނިންމެވުމުން ޕީއެންސީން ވަނީ އެކަމަށް މަރުޙަބާވެސް ކިޔާފައެވެ.
ވޭޕަކީ ސިއްޙީގޮތުން ނުރައްކާތެރި އެއްޗެއްގެ އިތުރުން މަސްތުވާތަކެތިވެސް އެއަށް އަޅައިގެން ވިއްކަމުންދާ ބާވަތެކެވެ. މައުލޫމާތު ލިބޭގޮތުގައި ސްކޫލްތަކުގެ ދަރިވަރުންގެ މެދުގައި މަސްތުވާތަކެއްޗަށް ޝައުގުވެރިކަން ހޯދުމަށްޓަކައި ވޭޕަށް މަސްތުވާތަކެތި އަޅައިގެން ދަނީ ވިއްކަމުންނެވެ.
ސިއްޚީ ދާއިރާގެ މާހިރުން ވޭޕު މަނާކުރަން ގޮވާލަމުން އަންނަތާ އަހަރު ތަކެއް ވެފައި ވާއިރު ނިމިދިޔަ ސަރުކާރުން މިކަމުގައި ފިޔަވަޅެއް އަޅާފައި ނުވާކަންވެސް ޕީއެންސީގެ ބަޔާނުގައި ބުނެފައިވެއެވެ.
ޕީއެންސީން ބުނީ ރައީސްގެ ނިންމެވުމަށް އެޕާޓީން ފުރިހަމައަށް ތާއީދު ކުރާކަމަށެވެ. އަދި އެކަމުގައި ހުރިހާ ރައްޔިތުންގެ އެއްބާރުލުމަށްވެސް އެޕާޓީން ވަނީ ގޮވާލާފައެވެ.
