މަސްތުވާ ތަކެތީގެ ވިޔަފާރީގައި ޝާމިލުވާ މީހުންނާއި، ގޭންގު ތަކުން ފުލުހުންނަށް ހުށަހަޅާ ރިޝްވަތަށް ނޫނެކޭ ބުނުމަށްފަހު، އެފަދަ ކުށްވެރިންނާ ދެކޮޅަށް ފުލުހުން މަސައްކަތް ކުރަން ޖެހޭނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ރޭ ބޭއްވި 36 ވަނަ ފުލުހުންގެ އަސާސީ ތަމްރީނު ކޯހުގެ ދަސްވެނިމުމުގެ ރަސްމިއްޔާތުގައި. ވާހަކަ ދައްކަވަމުން އިހުސާން ވިދާޅުވީ ސަރުކާރުގެ އެންމެ މުހިންމު ސިޔާސަތަކީ ކުށް މަދު އަމާން ރާއްޖެއް ގާއިމު ކުރުން ކަމަށެވެ. އެކަން ހާސިލް ކުރުމުގައި އެންމެ މުހިންމު މަސައްކަތެއް ކުރާ ބަޔަކީ ފުލުހުން ކަމަށް އިހުސާން ވިދާޅުވިއެވެ.
"ދިވެހި ސަރުކާރުން މިއަދު ފުލުހުންގެ ކިބައިން އެދޭ މުހިންމު ކަންކަން އެބަހުރި. ރާއްޖެއަކީ މަސްތުވާ ތަކެތިން އެއްކޮށް ސަލާމަތް ކޮށްފައިވާ މުޖުތަމައު އަކަށް ހެދުމާއި، ރާއްޖެއަކީ ގޭންގު ހަދައިގެން ކުށްކުރަމުންދާ ވެއްޓެއްގެ ގޮތުގައި އޮތް އޮތުން ބަދަލު ކުރުމާއި، ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ ކަންކަން ޤާނޫނީ އިމަށް ގެނައުމަކީ މީގެތެރެއިން އެންމެ މުހިންމު ކަންކަން،" އިހުސާން ވިދާޅުވިއެވެ.
"މިކަންކަން ވިޔަ ނުދިނުމަށް ދައުލަތުގެ އެތެރެއިންނާއި ބޭރުން އަދި މި ކަންކަން ކުރުމަށް ޝާމިލުވާ މީހުންގެ ފަރާތުން ރިޝްވަތު ހުށަހެޅުމާ އިންޒާރުދީ، ބިރު ދެއްކުމާއި ފުރައްސާރަކޮށް، ތި ކުދިންގެ މަސައްކަތަށް ހުރަސްއެޅުމަށް މަސައްކަތް ކުރާނެ،" މިނިސްޓަރު ވިދާޅުވިއެވެ.
އިހުސާން ވިދާޅުވީ ފުލުހުން ކުރާ ހުވާ މަތީގައި ދެގޮތެއް ނުވެ ތިބުމުން ކުށްމަދު އަމާން ރާއްޖެއެއް ރައްޔިތުންނަށް ލިބިގެންދާނެ ކަމަށެވެ.
